Siklu Violensia no Ameasa “Rama-Ambon” iha Timor-Leste

Siklu violensia entre foinsae sira iha Timor-Leste husi loron ba loron hetok aumenta bebeik. Aktu violensia entre foinsae sira ne’e hahu husi Munisipiu to’o mai kapital Dili. Asaun asalta malu ho grupu ka pesoal kontinua akontese iha estarada (luron) iha munisipiu sira inklui kapital Dili. Impaktu husi violensia hirak ne’e halo publiku senti in-seguru wainhira halo movimentu iha luron nomos iha sira nia bairo. Konstituisaun Republika Demokratika Timor-Leste – RDTL garante sidadaun ninia diretu ba moris seguru no sirkulasaun ka movimenta ba mai iha luron sira iha Timor-Leste ho livremente. No, laiha ema ida maka bele viola ema nia diretu ba moris seguru.

Pelu-kontariu, komunidade kontinua moris in-seguru husi ameasa sistimatizadu sira husi grupu no pesoal sira iha teriotoriu laran, liu-liu iha kapital Dili. Tuir Fundasaun Mahein – FM nia monitorizasaun durante inisiu Janeiru to’o Marsu 2016 hatudu katak nivel siguransa komunidade grave oituan kompara ho tinan 2015. Liu-liu violensia entre foinsae sira hanesan tuda-malu entre grupu estudante sira iha Munisipiu no ataka ema pesoal ho “rama-ambon” iha sidade Dili ne’ebé rezulta balun kanek no mate.

Tinan 2015 nia rohan, FM relata ona akontesementu sustifikadu iha kapital Dili, joven ida ne’ebé nu’udar siguransa privadu hetan hana ho “rama-ambon” husi ema deskuiñesidu iha bairo Hudi-Laran, kapital Dili nian. Nomos asaun oho malu ho kilat tradisional seluk durante periodu refere ne’ebé rezulta ema (foinsae) na’in 4 mate. Siklu violensia hirak ne’e halo komunidade senti preoukupa no la seguru iha sira nia bairo, iha tempu kalan. Instituisaun Polisia Nasional Timor-Leste – PNTL halo ona media preventive liu husi patrollamentu rutina tama-sai bairo durante periodu refere. Maibe, situasaun kontinua laiha mudansa to’o ohin loron.

ha inisiu (fulan Febreiru) 2016, publiku publiku preoukupa ho publikasaun media sosial kona-bá fotografia atakasaun husi grupu no pesoal ho “rama-ambon” iha parte Hudi-Laran no Fatu-hada nian. Maibe parte autoridade kompetente laiha “follow up” ka atensaun seriu ba informasaun hirak ne’e. Liu tiha fulan ida, iha fulan Marsu nia laran maizumenus joven na’in tolu maka sai vitima ba “rama-ambon”. Ema na’in rua hetan hana iha parte Beto (besik Sentru Formasaun Polisia Comoro) no ida seluk hetan hana iha Igreja Aimutin nian oin, kalan misa paskoa nian. Primeiru Ministru Rui Maria de Araujo senti preokupa no husu autoridade siguransa atu asegura komunidade nia moris husi ameasa “rama-ambon”.

Husi siklu violensia hirak ne’e, tuir monitorizasaun FM nian identifika katak asaun ataka malu no hana malu “rama-ambon” iha kapital Dili, iha relasaun metin ho Grupu Arte Marsial – GAM. Tuir rezultadu FM nia levantamentu (survey online) indika katak maizumenus 61% respondente indika katak preoukupa ho violensia entre GAM no foinsae sira iha Timor-Leste. Presiza iha mekanizmu adekuadu hodi prevene aktu violensia hirak ne’e iha futuru. Instituisaun PNTL tenki kontinua mantein halo patrollamentu rutina iha tempu kalan iha kapital Dili no Munisipiu sira ba fatin ne’ebé identifikadu nu’udar risku ba komunidade nia moris.

Fundasaun Mahein – Foto: Vitima Husi Rama Ambon Iha Igreja Aimutin