MAP Estabelese Sentru Investigasaun Peskas

Governu Liu husi Ministeriu Agrikultura e Peskas (MAP) estabelese sentru investigasaun peskas,ho objetivu atu halo peskiza ne’ebe klean kona ba riku soin iha tasi laran.

Ministru Agrikultura e Peskas (MAP), Estanislau da Silva, hateten liu husi sentru ne’e sei kontrola ikan sira iha tasi laran inklui halo investigasaun kona ba montante ikan hira mak iha tasi laran no hira mak lakon.

“Atu haree mos kona ba diversifikasaun ikan saida deit mak iha ita nia tasi laran,” nia hateten.

Tuir nia, importante tebes ba komunidades no entidades hotu atu hatene dadus sira ne’e, riku soin said deit mak iha tasi laran.

MAP konsege stabelese ona diresaun jeral e peskas iha tinan hirak liu ba, maibe nia dehan, ate agora seidauk funsiona ho diak.

Nia rekonese, katak durante ne’e governu seidauk dezenvolve area peskas ho diak inklui seidauk investe orsamentu ne’ebe masimu iha ne’e.

“Agora oinsa mak ita bele investe no halo investigasaun hodi iha konesementu diak, nune’e bele esplora rekursu tasi nian,” nia hateten.

Iha parte seluk Membru Parlamentu Jacinta Abu Cau Pereira, konkorda ho inisiativa ida ne’e, maibe presiza prepara uluk rekursu humanus no fasilidades.

Tanba tuir nia, servisu investigasaun ne’e presiza ema ne’ebe mak iha konesementu klean no iha esperiensia barak kona ba area peskas nian.

 “Atu nune’e ita bele hetan rezultadu ne’ebe diak no labele fakar osan deit,” nia hateten.

Nia dehan, esperiensia hatudu iha programa barak mak governu halo relasiona ho agrikultura e peskas nian, maibe tanba laiha rekursu humanus ne’ebe sufsiente, entaun programa sira ne’e paradu iha dalan klaran.

The Dili Weekly