NAI NAFATIN IHA FIEL NO HADOMI EMA HOTU

Padre Paróquia Sagrado Coração de Jesus Becora, Pe. Guilhermino da Silva, esplika iha nia homília, ba selebrasaun Jesus Futar Fuan Santu, nu’udar  komunidade Paróquia Becora nia mahein, ba dala 50 katak, hanesan bibi atan, Maromak nafatin iha fiel no hadomi ema hotu sem limitasaun.

“Mai haksolok ho ha’u, tamba ha’u hetán fali ona ha’u nia bibi ne’ebé lakon. Hanesan bibi atan, Maromak lahakarak ita la’o sala dalan no lakon, maski ita lakon, nia fiel nafatin buka ita no hetán fila fali ita, basa ninia domin hanesan nafatin ba ema diak no ba ema sala nain. Maromak hadomi sanulu resin sia i hadomi mós ida be lakon”,haklaken amu Guilhermino da silva, ba missa Domingo(05/06), Paróquia Becora SACORJES.

Pe. Guilhermino fundamenta katak, Maromak nia hadomi ne’e, ema ida labele kalkula, Maromak hadomi tebes ema hotu, hanesan Nia hadomi nia matan fuan rasik, basa ema hotu folin tebes ba Nia, no ema nu’udar Maromak nia imajem rasik.

“Domin ida ho sakrisika an ne’e, ita hetán duni iha Jesus nia an, domin ida ne’e simboliza mai ita ho nia fuan no laran, nia hamrik hodi hatudu ba nia fuan, atu ita hatene, atu ita koko no sente. Bibi ne’ebé lakon mak ita ema, dalaruma ita nega direta ka indireta Maromak nia domin iha ita  nia moris, ita husik hela de’it Maromak nia domin hodi monu ba sala no hakarak separa ita nia an husi Nai nia domin”,hatutan Pe. Guilhermino.

“Maluk sira ita selebra futar fuan Santu, ita komunidade Paróquia nia mahein, Paroquia Becora nu’udar ita nia uma, ita nia luhan, nia halibur ita hotu iha ne’e, Nia koñese ita ida-idak nia an, Nia hatene lolós se mak diak no se mak a’at, semak laran mós no semak laran foer. Selebrasaun ida ne’e ita halo nu’udar sinal ita nia respeitu no honra ba Nai Jesus ne’ebé hadomi ita, hanesan bibi atan ne’ebé hadomi ni bibi ne’ebé lakon”,reforsa Pe. Guilehrmino.

Pe. Pároco Becora ne’e reforsa, wainhira monu ba sala, ema iha tendénsia ida, hakarak halai husi Nai, no hasubar an tiha iha duut laran sala nian, tantu tamba moe ka tauk hasoru Maromak nia kastigu. Maibé, hahalok husi bibi atan ne’ebé hadomi nia bibi ne’e, bele hametin ema nia laran, fó korajem ba ema no motiva sira atu fila fali ba Nai nia luhan.

“Husi Nai nu’udar  bibi atan nia ezemplu, hein katak ita mós prontu, buka no hetán maluk sira ne’ebé sala no lakon hodi lori sira fila ba Nai nia liman, halo Nai hakuak sira nu’udar bibi atan ne’ebé hadomi nia bibi sira. Maluk sira, ita Maromak nia bibi au mesmu tempu ita mós bibi atan iha moris ne’e, tamba ne’e, mai ita hetene ita nia an, hala’o ita ida-idak nia knaar iha ita nia moris atu fó gloria, honra no respeitu nafatin ba Maromak nia domin mai ita ne’ebé boot tebes no rohan laek ne’e”,termina amu ne’e iha nia homilia.ias

Jornal Nacional