Uniaun Europeia Parseiru Importante Timor-Leste

Dili, Radio Liberdade Online - Uniaun Europeia sai hanesan parseiru importante ida ba nasaun Timor-Leste, nune’e liu husi dialogu Sesta 10/6/2016, tuir planu durante tinan lima nia laran Uniaun Europeia mós sei fó tan apoiu balun ho montante ne’ebé bo’ot, no apoiu ne’e konsentra liu ba áreas hirak  ne’ebé importante iha Timor-Leste. Lia hirak ne’e hato’o husi Primeiru Ministru TL Dr. Rui Maria de Araújo hafoin enkontru ho Prezidenti Repúblika Taur Matan Ruak, foin lalais iha Palásiu Prezidenti Aitarak Laran-Díli. 

“Sira nia planu durante tinan lima nia laran, atu fó apoiu ba Timor-Leste iha montante 95 milhões de Euros, entaun ita presiza ko’alia ho sira para atu haree oinsá fó apoiu ida ne’e mai ita, sira nia konsentrasaun apoiu sira nian iha dezenvolvimentu rural, iha área nutrisaun, iha área boa Governasaun, no iha área Justisa ninian,” isplika PM.

Xefe Governu ne’e realsa, kontinuasaun husi diálogu ne’e tuir planu semana oin, delegasaun Governu TL sei ba to’o Bruxelas, hodi diskuti detalladu liu tan kona-ba apoiu hirak ne’e, no nia dehan maske ikus ne’e ita la duun dependenti ona ba parseiru dezenvolvimentu, maibé karik sira hakarak apoia, ita nafatin akomoda hodi halo diálogu ho sira, “kontinuasaun husi diálogu ida ne’e semana hirak oin mai governu sei iha delegasaun ida ba to’o iha Bruxelas, para halo mós konversasoens ho sira detalladamente liu tan, I ko’alia mós iha ámbitu implementasaun objetivus dezenvolvimentus sustentavél ninian iha Timor-Leste, Oinsá maka ita nia parseiru sira iha Uniaun Europeia bele apoia ita makaas liu tan, embora ita ikus ne’e la duun dependenti ona ba apoiu parseiru dezenvolvimentu nian, mas  ita nia dezenvolviemntu ne’e sei presiza rekursu barak, ita bele uza ita nia rekursus rasik, maibé wainhira parseiru dezenvolvimentu sira iha disponibilidadi atu apoia ita, ita mos tenki buka akomoda, buka halo diálogu nafatin sira.” 

Iha diálogu ne’ebé maka sei hala’o iha Bruxelas semana oin, Primeiru Ministru Dr. Rui Maria de Araújo  rasik mak sei ba partisipa.  

Rádio Liberdade Dili