CNE SEI INVESTIGA PARTIDU LAIHA SEDE

DILI - ComissãoNacional das Eleições (CNE)sei halo investigasaun ba Partidu Polítika sira ne’ebé laiha sede. Asaun ne’e CNE tau iha prioridade tanba tuir lei obriga partidu hotu tenke iha sede.

Prezidente CNE, José Agostinho da Costa Belo hatete, bainhira CNE hetan partidu ne’ebé laiha sede sei hetan sansaun todan.

“Ami sei halo investigasaun klean tanba saida mak simu hela osan maibé labele halo sede. Entaun osan sira ne’e ba ne’ebé, tanba ne’e ami sei akompaña nafatin,” subliña Prezidente CNE, José Belo hafóin enkontru ho nia stakeholder sira hodi halo avaliasaun ba eleisaun 2007 no 2012.

Entertantu iha fatin hanesan, Observadór Polítika hosi  Universidade Timor Lorosa’e (UNTL), Camilio Ximenes Almeida hatete, asaun ne’ebé CNE atu halo ne’e importante tebes tanba iha duni partidu balun halo de’it atividade iha otel.

“Partidu sira labele ko’alia  de’it sede iha Dili, mais partidu barak ne’ebé ita haré  ne’e enkontru de’it iha otel bobot, sira mós sede laiha,” hatutan Camilio.

“Partidu polítika sira labele hanesan fali emprejarius sira balun ne’ebé edefisiu ne’e iha de’it bolsu laran, depois kona tender foin mak ba foti osan hodi hala’o projetu ate laiha kualidade ne’e problema bo’ot ida.(rio)

Timor Post