Prezidente Taur Deklara tan Rikusoin Ba Tribunál Rekursu

DILI, (ANTIL) – Prezidente Repúblika, Taur Matan Ruak deklara rikusoin ba Tribunál Rekursu, Tersa (5/9) iha Kaikoli Dili. Deklarasaun rikusoin ida ne’e reprezenta hosi Espoza PR, Isabel Ferreira.

Asaun ida ne’e atu atualiza informasaun ne’ebé disponível iha TR kona-ba “renumerasaun kargu, funsaun no atividade profisionál sira ne’ebé ezerse hosi deklarante, hanesan mós partisipasaun finanseira sira hotu ne’ebé iha”, tuir buat ne’ebé defini hosi lei 7/2007, 25 Jullu kona-ba Estatutu ba Titulár sira Órgaun Soberania nian.

“Ha’u la’ós jerasaun ‘75 nian maibé, ha’u mós la’ós jerasaun ida ne’ebé “pásivu ka hakmatek de’it iha fatin” hanesan autoridade, ha’u hatene didi’ak ha’u nia direitu sira no iha konxiénsia ba ha’u nia dever tomak ba ema seluk, liu-liu ba sira ne’ebé presiza ha’u nia ajuda”, espoza PR ba jornalista sira liuhusi konferénsia imprensa iha salaun Kaza Militár Palásiu Prezidénsia Repúblika, Bairu­-Pit­é, Dili.

Isabel informa, prinsípu sira ba sidadania di’ak maka orienta ninia moris tomak no nia perkursu: familiár, profisionál no umanu, ne’e duni ninia antesedente no rezultadu sira hatudu rasik ona, la-presiza atu repete fali ninia perkursu hanesan Jurista no Ativista ba Direitu fundamentál sira.

Rikusoin ne’ebé deklara inklui oan sira nian no mós kareta no rai hanesan, iha Banku Nasionál Ultramarinu (BNU) Timor, atualmente iha loron 24 Agustu 2016, Prezidente Taur Matan Ruak iha saldu $6,963.00. Banku ne’ebé hanesan (BNU), Taur Matan Ruak iha saldu dollar Amérika 922.95 (23 Agustu 2016).

Enkuantu, espoza nia saldu iha Banku Mandiri ho valór $5, 836.00 (deklarasaun banku hasai iha 5 Setembru 2016). Banku Westpac Banking  Corporation iha saldu dollar Austrália 7,304.00 (3 Agustu 2016) no iha banku ne’ebé hanesan (Westpac Banking  Corporation), Isabel Ferreira mós iha saldu dollar Austrália 12,049.00 (3 Setembru 2016). Banku KCP Atambua, Isabel Ferreira nia saldu dollar Amérika 1.712 (27 Agustu 2016).

Lola Ruak (oan feto hosi Prezidente Taur) nia saldu iha BNU dollar Amérika 16,797.00 (24 Agustu 2016). Quesadhip Ruak Ferreira de Vasconselhos (oan mane Prezidenti Taur) nia saldu iha BNU dollar Amérika 14,673.00 (24 Agustu 2016). Albertina Tamarisa Ruak Ferreira (oan feto Prezidente Taur) nia saldu iha BNU dollar Amérika 11,513.40 (24 Agustu 2016).

Prezidente Taur Matan Ruak iha rai privadu ho metrus kuadradus 18.000 ne’ebé lokaliza iha Metiaut, Postu Administrativu Kristu Rei, Dili. Prezidente Taur iha rai eransa iha Suku Osso-Una, Postu Administrativu Baguia, Baucau, ne’ebé seidauk rejistadu.

Taur iha rai metrus kuadradus 47.000 iha Suku Letefoho, Postu Administrativu Same Vila, Manufahi no iha rai hektares 130 ne’ebé lokaliza iha Suku Betano, Postu Administrativu Same Vila, Manufahi.

Rikusoin sira seluk maka kareta Land Rover (4×4) ho matríkula 10002 TLS, rejistadu 2001. Toyota Mitsubishi (natón) ho matríkula 10002 TLS, rejistadu 2002. Toyota Prado (4×4) ho matríkula 25225 TLS, rejistadu 2011.

Prezidente deklara rikusoin kuaze tinan-tinan durante mandatu hanesan aktu obrigatóriu ba ukun na’in sira, hahú hosi prezidente repúblika to’o ministru no sekretáriu estadu sira.  (jornalista: Xisto Freitas; editora: Rita Almeida)

Foto: Espoza Prezidenti Repúblika, Isabel Ferreira deklara rikusoin ba jornalista sira liuhusi konferénsia imprensa antes aprezenta ba Tribunál Rekursu, 6 Setembru 2016. Foto ANTIL/Xisto Freitas