4 SETEMBRU LAKON BA DADAUK

DILI - Loron 4 fulan Setembru nu’udar loron istóriku, iha ne’ebé eis Sekretáriu Jeral Nasoens Unidas (ONU), Kofi Annan fó sai rezultadu eleisaun referendum iha tinan 1999.

Tinan hirak ba kotuk la hanesan ona tinan ida ne’e. Loron 4 Setembru ba tinan ida ne’e laiha ona timoroan sira sunu lilin iha estrada ibun sira iha sidade Dili hodi relembra hikas loron hanesan iha tinan 1999, milísia no TNI sira oho no sunu motuk sidade Dili no Timor laran tomak.

Foin maka tinan 17, maibé timoroan sira haluha tiha ona atu halo fali refleksaun ho asaun sunu lilin no asaun seluk ne’ebé bele hanoin hikas loron istóriku ida ne’e. Memoria loron ida ne’e lakon ba dadauk.

Komunidade Luis da Costa Marçal (54) husu ba timoroan hotu atu halo reflesaun, katak, hahú kedas iha loron ne’e Timor Leste hetan naroman, maibé milísia no TNI kontinua sunu motuk no oho timoroan sira.

Luis haktuir, momentu ne’eba Timor motuk no timoroan mate no halai namakari balun ba loro monu balun ba lorosa’e ba halai ba ailaran no balun mate tanba hetan oho hosi  Pro-autonomista sira.

“Ita Timor oan tenke halo reflesaun ba momentu importante sira hanesan loron 4 fulan setembru nian par liliu Joven sira tenke hatene, lideransa Nasaun sira tenke hatene oinsa mak kria paz no estabilidade iha rai ida ne’e atu nune’e povu ne’e labele halai tan hanesan ulun no rai ne’e labele motuk tan,”dehan komunidade Luis ba Timor Post iha Komoro, Domingu (04/09).

Nune’e nia dehan, importante mak ukun nain sira tenke halo asaun ruma ba loron historiku sira nune’e par jerasaun fóun sira hotu bele hatene katak terus ikus hosi  luta naruk ne’ebé Timor Leste hasoru mak iha loron 4 fulan setembru ne’ebé Timor laran motuk bainhira rona rezultadu eleisaun Timor ukun an.

Tan ne’e ba oin Timor atu labele terus tan hanesan uluk, Timor oan tenke goza duni ona tanba uluk maluk barak fó an ba rai ne’e atu jerasaun sira lebele terus tan, atu Jerasaun sira tenke goza duni iha independensia.

Entertantu tuir dadus balun ne’ebé Timor post asesu, 30 Augosto Referendo iha Timor Loro Sa’e tama ba historia. Emar tuir eleisaun besik 450,000. Emar halo parte to’o 98.6%.

Nune’e 4 Setembro Hatete sae resultado kona ba referendo. Vota ba ukun rasik an menan 78.5%. Vota ba autonomia menan 21.5%. Comunidade internasional aceita ukun rasik an ba Timor Loro Sa’e.

Maibe grupo milicia pro-integrasaun hahu operasaun violensia ba emar ho cidade. Staf UNAMET no jornalistas sira halai.

Populasaun besik 250,000 ~ 300,000 emar obriga atu halai sai ba Timor Loro Monu ho rai seluk hosi  Indonesia. Emar besik rihun ida mate.

Timor Loro Sa’e hahu runguranga. Iha horas tolu dadersan populasaun barak maka halai ba Dare, Waimori, Bemós ho fatin seluk-seluk tan, durante semana tolu nia laran to’o INTERFET (International Fórce East Timor = Fórsa Internasional ba Timor Loro Sa’e) tama iha Timor Loro Sa’e.

Iha tempo neeba mós populasaun barak la lori bukae barak to’o loron bukae ne’e hotu populasaun tun mai Dili buka hahan ruma atu aguenta moris.(rio)

Timor Post