Ema Balun Ko’alia Midar Sein Oratika

DILI - Ministru Estadu Koordenador Asuntu Ekonomia no Ministru Agrikultura i Peskas (MAP), Estanislau Aleixo da Silva hatete, durante tinan barak liuba produsaun ai-han marka pasu, tanba ne’e Xanana bolu nia ba atu hadi’a.

“Ema balu ko’alia ibun midar los, mas kuandu ka’er tiha kargu la halo buat ida. Ita iha esperiénsia tinan hirak liu ba, ha’u hakarak husu tanba saida mak Xanana bolu ha’u hosi deputadu atu ba tu’ur iha Agrikultura, sé buat hotu la’o  di’ak, Xanana sei la bolu ha’u ba iha ne’eba, ita ko’alia  lolo’os de’it hanesan ema timoroan, tenke iha korajen atu ko’alia, ema balu kanta de’it, mas ami agora halo servisu, ha’u fi’ar bele halo di’ak liu tan iha area agrikultura,” Estanislau ba Jornalista sira iha Palásiu Governu, Tersa, (18/10), relasiona ho númiru produtu importasaun sei domina iha merkadu tanba produsaun lokal sei menus.

Nia hatete, kulpa eis ministru (Mariano Assanami Sabino) nian maka sosa tratór fahe ba agrikultor sira maibé la hatudu rejultadu ne’ebé di’ak tanba laiha manutensaun ba tratór sira ne’e ho di’ak ikus mai a’at hotu.

“Sosa tratores barak agora iha barak mak a’at ona, ne’e ha’u nia kulpa?, ha’u mak sosa tratores barak sira ne’e fahe ba ema?. Mas agora ami servisu hodi  halo ida ne’e,” Estanislau hatete.

Nia dehan, produsaun sira ne’e tenke iha merkadu, atu halo importasaun tenke iha lei, mas lei seidauk iha, buat sira ne’e hotu la’ós  fasil.

Tuir nia, produsaun agora seidauk bele to’o atu nesesita komunidade Timór, tanba ne’e sei la taka importasaun, ai-han ne’ebé mak produz iha Timór haan to’o fulan tolu de’it depois ida ne’e hahan atu haan la iha ona.

Tanba ne’e, Estanislau subliña, provizoriamente Timor Leste sei depende hela ba importasaun.

Parte ida fali mak haré  ba udan bee, bele fila rai barak, mas udan been la mai, ne’e mos problema.

Nune’e nia husu povu Timor Leste tenke prontu atu servisu, ema barak hatete dehan, ministeriu agrukultura la halo servisu ne’e, mas la’ós MAP mak ba kuda rai, povu mak kuda rai.

“Uluk ha’u tama iha governu tratores 200 resin mak a’at, mas agora tratores balu mak hadi’a komesa di’ak no tratores barak mak hadi’a  la di’ak,” Estanislau haktuir.

“Tinan oin mai ami tau osan atu sosa tan tratores balu, tarjetu atu sosa tan tratores 35, no ami agora haré  tuir kalendáriu fila rai nian, ne’ebé ezemplu Maliana atu fila rai, tratores hosi Liquisa mos sei koloka hotu ba iha ne’eba atu fila de’it rai, programa ne’e halo hodi minimiza tratores sira ne’e labele hela de’it iha munisípiu  ida,” Estanislau hatutan.

Osan montante hira mak atu sosa tratores ne’ebé temi la dun fiksa, mas planu ministériu nian iha ona atu sosa tan trator.(gus)

Timor Post