Laiha Ona Dezentedimentu Entre Fiskalizadór Projetu ZEESM

DILI, (ANTIL) - Sekretária Rejionál Administrasaun no Finansas, Rejiaun Autonomia Espesial Oe-Cusse Ambeno (RAEOA)/Zona Espesiál Ekonómia Sosiál Merkadu (ZEMSS) Oé-cusse, Leonia Monteiro informa, mosu  dezintendimentu entre fiskalizadór projeitu husi Portugal ho tekniku projeitu ema Indonezia ba .implementasaun projetu sira.

Maske nune’e,  ikus ne’e komesa intende malu, hafoin iha intervensaun hosi Prezidenti Autoridade ZEESM,  Mari Alkatiri.

“Bainhira halo konstruksaun, sira la konsege intende malu. Tanba Asia ho Europa, kualidade la hanesan. Maibé ita-nia polítika hakarak halo konstrusaun ho kualidade di’ak,” Leonia Monteiro esplika ba Deputadu sira iha Plenaria, bainhira halo audensia ho komisaun C Parlamentu Nasionál (PN), Sesta (4/11).

Kona-ba ezekusaun projeitu estrada, to’o oras-ne’e seidauk bele atinji 100%, tanba kestaun estudu.  “ Presiza haree didi’ak estudu sira, hanesan geolojika, geofizika, hodi nune’e bainhira tama ona implementasaun bele garante kualidade,” nia dehan tan.

Estrada sira hanesan Citrana to’o Oésillo seidauk halo konkursu, tanba presiza uluk estudu estudu. Hafoin deteta asuntu sira liuhusi estudu, foin halo levantamentu no aprezenta ba Komisaun Aprovsionamentu Nasionál atu halo konkursu.

Kona-ba projeitu turistika turismu integradu, liu-liu projeitu Jardin Monumentu Lifau seidauk konklui, tamba sei hadi’ak tuir regra ne’ebé difini ona no presiza uluk Governu sentral entrega projeitu  sira ne’e ba Autoridade.

Projeitu Dezenvolvimentu Kapital Úmanu, Leonia esplika, haruka ona ema hamutuk na’in 22 ba Kuba, tuir formasaun agrikultura. ZEESM mós halo koperasaun ho SEPFOPE, fó formasaun ba juventude sira, atu to’o ikus iha abilidade no bele partisipa iha dezenvolvimentu.

“Juventude hamutuk 74 iha ona sentru Tibar no sentru formasaun Don Bosco iha juventude hamutuk 75,” Leonia Monteiro relata tan.

Iha fatin hanesan, deputadu Jose Luis Gutteres agradese ba ekipa ZEESM, tanba iha susesu bainhira hala’o nia knaar durante tinan rua nia laran. “Ita boot sira-nia susesu, sei sai mós susesu ba povu Oé-cusse,” Jose Luis Gutteres dehan. (Jornalista: Manuel Pinto / Editór: Otelio Ote)