LERE: DEMOKRASIA TL LA’O SABRAUT LOS

Xefi Estadu Maior das Forsas Armadas FALINTIL Forsa Defeza Timor Leste (F-FDTL), Maijor Jeneral Lere Anan Timur dehan, demokrásia iha Timor Leste (TL) la’o sabraut tebes, tanba Timoroan sira la intende loloos, saida mak demokrasia ne’e.

Demokrasia ne’e mai husi lia fuan rua, Demos (Poder) ho Kratein (Povu). Tanba ne’e Demokrasia ne’e, poder iha povu nia liman ka povu mak iha poder liu. Maibé poder ne’e la’os arbiru deit, sempre iha nia limitasoens.

“Ate ita nia Prezidenti ho Primeiru Ministru mós ita tolok ne’e, ida ne’e demokrásia ida sabra’ut ninian,” katak Lere Anan Timur ba jornalista sira iha Palácio Prezidénsia Repúblika Aitarak Laran Díli, foin lalais ne’e, hafoin hasoru malu ho Xefi Estadu Taur Matan Ruak hodi informa konaba servisu instituisaun nian.

Lere Anan Timur hatutan katak, demokrásia ne’e, demokrásia duni, mas iha limitasaun. Demokrásia ne’ebé mak aas liu iha mundu ne’e mak Timor ona.

“Ha’u mak Primeiru Ministru, hasai dekretu lei ida, sé mak tolok Primeiru Ministru, kaer hatama tiha kadeia,” esklarese Lere Anan Timur.

Lere haktuir katak, demokrásia iha TL ne’e aas liu, tanba buat hotu ema bele ko’alia, maibé la sukat.

Nia afirma, TL nasaun ida ne’ebé demokrátiku liu iha mundu, tanba laiha violasaun direitus humanus.

Lere hatutan, ohin loron ema ne’ebé uluk lakohi ukun-an mós hari’i partidu, no uluk lakohi ukun-an mós, agora ba tu’ur fali iha Governu.

“Maibé ita kuandu servi ona Estadu, tenki servi ho nasionalismu. Ohin loron ita hotu akompaiña, di’ak ne’e husi ne’ebé no aat ne’e husi ne’ebé,” tenik Lere.

Tanba ne’e, Lere Anan Timur dehan, presiza edukasaun sívika ba sidadaun TL, li-liu joven sira kona-ba saida mak sidadania ne’e.cos

Jornal Nacional