quarta-feira, 1 de março de 2017

Maijen Lere: Kuandu Nesesita Bele mós Hasai Ema-nia Vida

PARTILHAR
DILI: Eleisaun Prezidensial no Parlamentar ba tinan ida ne’e la’os sai de’it teste ba Instituisaun Defeza no Seguransa, maibé mós sai teste ba Partidu Politiku sira atu hatudu sira-nia maturidade no responsabilidade hodi kontinua garante paz no estabilidade iha nasaun ne’e.

Iha parte seguransa nian, eleisaun jeral ba tinan ne’e diferente ho tinan 2002, 2007 no 2012, tanba iha altura ne’eba, Organizasaun Nasaun Unidus (ONU) sei fó apoiu masimu, maibé ba tinan ne’e nudar eleisaun jeral dahuluk ne’ebé Timor-oan rasik mak kaer no responsabiliza.

Tan ne’e, lideransa FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL) apela ba Timor-oan hotu, liliu ba Partidu Politiku sira ne’ebé sei envolve iha prosesu eleisaun, atu asegura ambiente paz no dame.

Xefe Estadu Maior Jeneral F-FDTL, Maijor Jeneral Lere Anan Timur fó apela ne’ebé maka’as.

"Misaun rua ne’e (F-FDTL ho PNTL) ninia misaun mak atu intervee, reprime problema ruma mosu iha ita-nia rai laran ou situasaun ruma ne’ebé kria instabilidade ba ita-nia estadu. Misaun rua ne’e kuandu tuun iha terenu atu intervee ka reprime, signifika katak baku ema, hakanek ema,  i kuandu nesesita bele mós hasai ema-nia vida, tanba instrumentu estadu nian la’os (Komisariu PNTL) Julio (Hornai) ka Lere nian,” deklara Maijor Jeneral (Maije) Lere ba jornalista sira liu husi konferensia imprensa iha Kuartel Jeral PNTL, Kaikoli-Dili, Segunda (27/02).

Lere afirma, eleisaun iha tinan ne’e diferente tebes tanba povu Timor-Leste hamriik mesak no la’o mesak atu foti ukun-nain sira hodi kaer destinu nasaun nian.

Tan ne’e, Maijen Lere apela ba Timor-oan tomak, ba lider politikus no joven sira atu mantein dixiplina no responsabilidade.

“Liliu partidu politiku sira ne’ebé iha ligasaun emosional ho artemarsiais sira atu kontrola, tanba eleisaun tinan ida ne’e koko, sadik lider idaidak nia matenek, maturidade, responsabilidade, nasionalizmu no patriotizmu hanesan mós ba povu tomak,” dehan nia.

Iha fatin hanesan, Komandante Jeral PNTL, Komisariu Julio da Costa Hornai afirma, F-FDTL ho PNTL sei foti medidas forte sein negosiasaun ba individu ka grupu ruma ne’ebé mak koko estraga estabilidade ka kria problema iha ambiente eleisaun jeral.

"Ami husu ema hothotu nudar Timor-oan, husi katuas no ferik, mane no feto, labarik no joven, estudantes ho analfabetus, rai-nain no estranjeirus ne’ebé moris ka hela iha rai Timor-Leste, hothotu kontribui pas no estabilidade iha rai ida ne’e, espesial liu iha prosesu eleisaun ida ne’e, hahú husi prosesu kampañ to'o ba eleisaun,” deklara Komisariu Julio.

Tan ne’e, Komisariu Julio husu ba Parpol hothotu hodi toma responsabilidade importante ida hanesan edukasaun ba militantes atu respeitu malu no fiar malu.

Komisariu Julio informa, nia parte sei reforsa tan patrullamentu no hasa’e intensidade check point hodi pasa revista ba sasan kroat.

“La kleur tan Lei kona-ba armas brancas sei aprova no promulga, ne’ebé PNTL sei implementa ho rigorozu,” dehan Komisariu Julio. (*)

Ola Timor - Estaziariu -  Editór: Tellukoro
Foto: Maijor Jeneral Lere Anan Timur hato'o deklarasaun ba jornalista sira. FOTO: olatimornews.com
PARTILHAR

Author: verified_user

Publicação luso-timorense sem fins lucrativos

0 comentários: