quarta-feira, 1 de março de 2017

PNTL sei Asegura Seguransa ba Marsa Paz 2 Marsu

PARTILHAR
DILI: Polisia Nasionál Timor-Leste simu ona karta koñesimentu husi Dioseze Dili atu realiza marsa ba paz iha loron 2 Marsu 2017.

Tuir karta ne’e, Marsa ba Paz ne’e sei hahú ho misa iha Igreja Aimutin-Dili, hafoin sei hala’o mars aba Largo Lersidere no sei kontinua ho programa palku muzika iha kalan.

Molok ne’e, parte Dioseze Dili hamosu planu atu hala’o marsa ba pas iha loron 2 Marsu, loron ida molok Kandidatu Prezidente Repúblika sira hahú sira-nia kampaña.

“Marsa ba paz ne’e tenke ba paz, labele lori fali sasan kroat, labele kontra sinais tranzitu, tanba regra hothotu iha ona,” deklara Segundo Komandante PNTL Munisipiu Dili, Euclides Belo ba olatimornews.com iha nia knar fatin, Kuartel PNTL Dili, foin lalais.


Nia dehan, PNTL prontu atu fó apoiu ba programa marsa ba paz, no nia hein katak sei iha koordenasaun ne’ebé di’ak entre parte Dioseze Dili ho Komando PNTL Munisipiu Dili nune’e marsa ne’e bele la’o ho di’ak to’o rohan.

“Polisia impoin nafatin lei no orden, importante mak husu ba maluk sira atu mai tuir seremonia ne’e hodi fortifika liu tan ita-nia identidade hanesan ema Kristaun, no hatudu ba públiku katak ita uniku investe prosesu paz no estabilidade iha kapital Dili,” apela Segundo Komandante ne’e. (*)

Ola Timor – Estaziariu -  Editór: Tellukoro

Foto: Madre ida fo komunga ba membru PNTL ne'ebe fo seguransa ba manifestasaun ne'ebe organiza husi Igreja Katolika iha tinan 2004. FOTO: Ermera Blogspot (http://ermera.blogspot.com/)
PARTILHAR

Author: verified_user

Publicação luso-timorense sem fins lucrativos

0 comentários: