Taur Matan Ruak kondekora figura prinsipal sira Estadu nian iha mandatu nia rohan

Prezidente Repúblika timoroan, Taur Matan Ruak, kondekora ona figura prinsipal sira hosi Estadu, inklui primeiru-ministru, prezidente no eis-prezidente Parlamentu Nasional no eis-prezidente Tribunal Rekursu, iha nia mandatu nia rohan.

Dekretu sira ne'ebé publika iha Jornal da Repúblika fó hatene mós rekoñesimentu hosi xefe Estadu ho Medalla Orden Timor-Leste nian ba sidadaun nasional no estranjeiru oioin, inklui ba jornalista hosi Rádio Renascença, Anabela Góis.

Ho Medalla Méritu fó ba Carlos Monjardino, prezidente hosi Fundasaun Oriente ne'ebé Taur Matan Ruak destaka hanesan "apoiante kleur ba kauza Timor-Leste nian", hodi subliña asaun hosi Fundasaun Oriente iha nasaun, inklui ho rekuperasaun hosi Hotel Timor.

Rekoñese mós Liga dos Amigos de Timor, ho sede iha Portugal, neozelandeza Maria Leadbeater no ema inglés Peter Gordon ho Steve Cox.

Xefe Estadu kondekora ho Colar da Ordem hosi Timor-Leste prezidente atual Parlamentu Nasional, Adérito Hugo da Costa no eis-prezidente parlamentu Vicente da Silva Guterres.

Atual prezidente hetan rekoñesimentu tanba "exelénsia hosi nia dezempeñu profisional no extraordináriu kualidade sira no kompeténsia sira" no nia antesesor tanba "firmeza, integridade hosi karakter no abnegasaun" iha nia serbisu "notável" ba nasaun.

Eis-prezidente Tribunal Rekursu nian, Guilhermino da Silva - ne'ebé demiti ona iha semana liubá tanba motivu saúde nian -, simu Colar da Ordem Timor-Leste nian tanba "luta maka'as ba dignifikasaun hosi justisa no hosi funsaun judisiáriu nian, promove independénsia hosi juís sira".

Rui Maria de Araújo, primeiru-ministru, simu Colar da Ordem Timor-Leste nian tanba halo atuasaun ho "sentidu Estadu ne'ebé aas".

Kondekoradu sira seluk maka númeru daruak hosi forsa defeza nian, brigadeiru-jeneral Filomeno Paixão de Jesus ne'ebé maka simu Insígnia hosi Orden Timor-Leste nian "tanba dedikasaun extraordináriu no efisiente" hodi kumpri nia knaar sira.

Taur Matan Ruak destaka "sentidu étiku klean, formasaun humanu sólidu", determinasaun no "kapasidade exepsional ne'ebé rekoñesidu hosi vizaun integradu" hosi militar ne'ebé kaer ona funsaun sira "iha períudu susar, kompleksu no ezijente tebes".

Koronel Falur Rate Laek, uluk nu'udar xefe Estadu Maior hosi F-FDTL, hetan mós rekoñesimentu tanba nia "karáter, lealdade, abnegasaun no espíritu sakrifísiu nian" no tanba nia atuasaun "serenu no oportunu nafatin" iha nia intervensaun sira.

Kondekora mós prokurador-jeral Repúblika, José Ximenes, ne'ebé nia mandatu renova ona hosi Taur Matan Ruak iha semana liubá no ne'ebé rekoñese ho Colar da Ordem Timor-Leste nian "tanba exelénsia hosi nia dezempeñu profisional no kualidade extraordináriu sira no kompeténsia pesoal sira".

Prezidente kondekora mós ho Insígnia da Ordem hosi Timor-Leste komandante daruak hosi Polísia Nasional Timor-Leste nian, komisáriu Faustino da Costa tanba serbisu "extraordináriu sira" no tanba asaun "responsável no kriteriozu" ne'ebé nia halo nafatin.

Iha parte nasional xefe Estadu desidi fó Medalla Orden Timor-Leste nian ema timoroan na'in 12 ne'ebé destaka ona iha períudu kombate hasoru okupasaun indonéziu.

Kondekorasaun sira sei entrega iha momentu tolu, iha iha loron-sesta ne'ebé hanoin atu entrega ba primeiru-ministru, prezidente no eis-prezidente Parlamentu nain, eis-prezidente Tribunal Rekursu nian, Prokurador-Jeral Repúblika nian, líder militar na'in rua no visi-responsável hosi PNTL.

Iha loron 12 Maiu sei entrega kondekorasaun "internu sira" ba elementu sira hosi ekipa Taur Matan Ruak nian no iha loron 17 sei entrega kondekorasaun ba ema estranjeiru sira no ba ema timoroan sira seluk ne'ebé hetan rekoñesimentu.

SAPO TL ho Lusa