quinta-feira, 4 de maio de 2017

“KONSOLIDA PARTIDU ATU SERVI DI’AK LIU TAN NASAUN”

Roger Rafael Soares* | opinião

Abertura ba Kongressu Nasional Datoluk husi Partidu Congresso Nacional de Reconstrução de Timor-Leste (CNRT) ne’ebé diriji husi Kompañeiru  Prezidente, Xanana Gusmão, destaka ho diskursu ne’ebé, marcantemente, nasionalista no realista, iha ne’ebé Prezidente halo hikas fali retrospetiva ida durante prosesu konstrusaun ita nia Estadu, iha ne’ebé P-CNRT halo parte, desde tinan ne’ebé partidu hahú moris, 2007. Iha abertura husi diskursu, Prezidente reiteira hikas fali kompromisu Partidu CNRT nian atu salvaguarda no garante páz no estabilidade, nune’e mós kontinua promove dezenvolvimentu povu no nasaun nian. 

Prezidente Partidu CNRT halo balansu ida ba knár polítiku ne’ebé dezenvolve ona durante tinan sanulu iha ezisténsia partidu CNRT nian, iha prosesu konstrusaun Estadu timorense.  Partidu CNRT mosu iha momentu ida ne’ebé rai Timor hasoru ka atravessa períodu ida ho “vulnerabilidade ne’ebé boot husi setores oi-oin iha sosiedade timorense nia laran”, kauzadu husi krize polítiku-militar iha tinan 2006, hamutuk ho fatór sira seluk, hanesan influensias externas iha polítika rai laran, ne’ebé reverte, consequentemente, ba agravamentu ba kondisoens moris timor oan sira nian.

Iha horizonte ka kuadru ida ne´e maka Partidu Kongressu Nasional ba Rekonstrusaun Timorense mosu, nudár “partidu polítiku ida ho ninia persepsaun ne’ebé klara kona-ba realidade pos-konflitu, ho kapasidade atu buka solusoes imediata ba problemas balun ho vizaun ne’ebé di’ak liu ba futuru ita-nia rain nian”. Prezidente hatúr ho klareza, iha ninia diskursu, efeitus no mós  susesus alkansadus iha tinan 10 nia laran iha partisipasaun P-CNRT nian ba prosesu konstrusaun Estadu, ne’ebé guia ho motto” “Liberta tiha ona Patria, agora tenki liberta povu”!. Destaka mós  iha intervensaun ida ne´e partisipasaun direta no indereta sidadauns tomak nian iha prosesu de konstrusaun Estadu ida ne´e.

Iha prosesu dezenvolvimentu nasional, sentradu iha “vizaun klara husi prioridades país nian no nessessidadis dahuluk husi populasaun”, Prezidente partidu, Xanana Gusmão, reforsa ideia ne’ebé dehan katak dezenvolvimentu nudár obra ida ne’ebé la hotu maibe la’o ba beibeik, iha medida ne’ebé, “dezenvolvimentu implika renovasaun esforsu ne’ebé firme no beibeik, husi definisaun lolós ba prioridades” bazeia iha análize ida kriteiriosa no realista kona-ba dezafius no nesessidades nasaun nian relasaun ho aspirasaun popular”. Nune’e  Prezidente P-CNRT realsa no valoriza importántsia husi “preparasaun partidu nian ba siklu foun ne’ebé besik ona atu hahu”,  no ho III kongressu ida ne´e sei sai nudár méiu ida atu kria mos Departamentu de Investigasaun kona-ba áreas ne’ebé iha extrema relevansia ba dezenvolvimentu nasaun nian, ne’ebé ezije ba partidu atitudi pro-ativu atu “hanoin no, liuliu, atu análize konjuntura polítika no sosiu-ekonómika nasaun nian”, atu nune’e bele aprezenta solusaun ne’ebé adekuada no lolós, ba realidadi nasaun nian, ho nune’e ita bele fó kontinuidade ba partidu CNRT nudár “partidu ida ne’ebé prontu atu serví no serví di’ak liu tan”.

Xanana Gusmão, Prezidente P-CNRT, aprezenta liñas mestres ba programa P-CNRT nian, ne’ebé kompremetidu tebes atu kontinua serví, beibeik no di’ak liu, povu no nasaun hodi assegura estabilidade no páz iha rai laran, fó tulun ba nasaun frazíl sira, koopera ho nasaun hotu-hotu iha rejiaun, dezenvole no hadi’ak relasoens ho nasaun membru CPLP nian.
  
Nune’e, atu dezenvolve partisipasaun ida boot liu tan, enkuadradu liu tan no ajustadu liu tan ba reál nesessidadi no aspirasaun povu nian, hodi kúmpri promessas ne’ebé kompremitidu, P - CNRT tenki reafirma liu tan ho forsa tomak, atu sai determinadu liu tan no empeñadu liu tan iha síklu polítiku foun, ne’ebé implíka partisipasaun, envolvimentu, dedikasaun, preparasaun di’ak liu no kontribuisaun ita hotu nian.

Bem haja ba ita hotu. 

*Rojer Rafael T. Soares | Ailili, Manatuto | rrtsoares@hotmail.com

NR: Este artigo de opinião foi gentilmente facultado pelo autor ao Timor Agora em 30 de Abril e só não foi publicado até agora devido a uma pausa de três dias do TA nas habituais publicações quotidianas. Pausa que nos desorganizou ligeiramente. Outros artigos chegados via email também estão com publicação atrasada. Todos serão publicados nas próximas horas. Pelo facto apresentamos as nossas veementes desculpas.

Sem comentários: