segunda-feira, 19 de junho de 2017

Joventude 25 Tuir Formasaun Edukasaun Sivika

PARTILHAR
Joventude nain 25 husi munisipiu lima (Ermera, Aileu, Liquisa, Dili no regiaun administrativa Oe-Cusse) tuir formasaun kona ba edukasaun sivika no abilidade fasilita formasaun iha sentru Sekretariadu Estado Joventude e Desportu (SEJD).

Xefe Departamentu Fortalesementu organizasaun Joventude SEJD, Jacinto Antonio Ximenes hatete formasaun ne’e ho objetivu hasa’e konesementu foinsa’e sira nian kona ba edukasaun sivika no abilidade fo formasaun. 

“Sira ne’e sei ba fo formasaun fali ba joven sira iha munisipios kona ba material ne’ebe hanesan,” nia hateten, iha Dili.

Formasaun durante semana ida ne’e, nia dehan partisipantes sira aprende teoria no pratika liu –liu halo diskusaun no planu ba formasaun sira intermus monitorizasaun no avaliasuan ba programa sira iha sentru. 

Entretantu reprezentante joventude munisipio Ermera, Maria Oliveira hateten matenek ne’ebe sira hetan sei fahe fali ba joventude voluntario sira seluk iha nia munisipio depois de fila husi formasaun ne’e.

Nia dehan, la’os informasaun kona ba edukasaun sivika deit maibe sira mos aprende kona ba komunikasaun ne’ebe diak no abilidade atu organiza eventu no formasaun ruma iha sentru laran. 

“Krime eleitoral ne’ebe agora dadaun ita haree, dala barak ita la komprende didiak dever sidadaun ida nian atu partisipa iha festa demokrasia, hanesan realidade foin dadaun ema barak la partisipa iha elisaun,” nia hateten.

Nia dehan, joven sira iha area rural asesu ba iha informasaun menus tebes entaun barak mak la fo importansia ba sira nia moris e kontinua involve aan iha problema sira. 

Iha parte seluk Asesora Nasional iha Kompania Alemanha GIZ, Leonesia Tecla da Silva hatete sira apoia teknika ba programa kapasitasaun ne’e tanba importante tebes atu joventude sira iha konesementu ne’ebe klean kona ba direitus humanu no oinsa sai sidadaun ne’ebe diak.

Alende ne’e, sira mos fo formasaun ba foinsa’e sira kona ba rezulusaun konflitu, transformasaun konflitu no siklu ba programa formasaun sira iha munisipios. 

“Programa bele remata, maibe matenek sei la hotu, e ami espera sira sei kontinua fahe matenek ne’ebe sira hetan ba joven sira seluk,” nia esperansa.

Nia hatete, formasaun ida ne’e ba terseira faze nian tanba antes sira fo ona formasaun hanesan ba iha joventude sira husi munisipio seluk.

Paulina Quintão | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: