Deputadu Foun Hatoo Parabens Ba Povu TL

DILI – Deputadu foun husi kuatru lejislatura Parlamentu Nasional (PN) neebe mai husi partidu foun 2 hanesan PLP ho Khunto hatoo parabens ba povu tomak iha Timor-Leste, tanba ultrapasa prosesu tomak liu husi eleisaun mai too agora hodi fo fiar ba sira tuur iha PN.

Lia fuan parabens nee hatoo husi Deputadu Bankada PLP, Mericio Akara hatete, sira hanesan deputadu foun hatoo parabens ba povu no nasaun, tanba fo fiar ba sira, hodi eleitu ba deputadu atu sai hanesan matan, tilun, ibun ba povu.

Hanesan deputadu foun husi partidu foun, neebe simu pose ona, nee rezultadu husi eleisaun nian, tanba haree ba eleisaun nee ita ultrapasa prosesu lubuk ida hanesan kapasidade husi povu no mos maturidade husi povu mak sira deputadu foun sira pose nee,” katak Mericio ba Jornalista Tersa (06/09/2017) iha PN bainhira partisipa iha Tomada de Pose ba kuatru Lejislatura.

Nia hatete, sira halao knaar nee hanesan obrigasaun atu servi ba povu, tanba nee sira tenke halao servisu tuir knar parlamentu nian ho seriedade, onestu, defende povu niA interese, ho lia los, tanba nee sira nia komitmentu atu servi ba povu ho serius atu nunee labele halimar.

Iha fatin hanesan, Deputada husi Bankada Khunto Armanda Berta dos Santos hatete, hanesan partidu foun neebe hetan fiar husi povu, hodi fo votus ba sira. Tanba nee sira tur hanesan deputadu hodi reprezenta povu iha Uma Fukun Parlamentu Nasional atu hodi servisu servi ba povu no nasaun ida nee. 

Guilhermina Franco | Suara Timor Lorosae