Numeru Moras Mental Iha HNGV Aumenta

DILI - Pasiente moras mental iha   Hospital Nasional Guido Valadares (HNGV) kada fulan sempre aumenta.

Tuir Espesialista Pisikiatria, Dotor Gaspar Quintão katak, inpaktu husi moras mental nee dalaruma halo pasiente sira bele depresaun, stress koko oho-an, ansidensia no bulak. Tanba nee   halo tratamentu iha ospital nasional kada fulan aumenta makas. Tanba lakonsege rezolve problema neebe afeita sira nia kakutak.

Hahu fulan Janeiru too Julho 2017 sira konsege registu deit ema nain 1.139 no balun ne’ebe la konsege registu, maibe sira visita ospital nasional buka tratamentu. Husi numeru nee balun konsege rekopera liuliu kazu depresaun oho an no ansidensia, maibe bulak presiza tempu naruk atu rekopera.

"Ita haree tuir sira nia intervista bainhira halo konsulta laos problema social deit maibe barak osan laiha, servisu laiha, hetan violensia, suporta menus, hela do’ok husi familia, faktor barak mak kontribui ba iha numeru as nee,” hateten Gaspar ba jornalista sira iha nia HNGV Bidau Dili, Segunda (4/9/2017).

Nia hatutan husi pasiente sira nee barak liu mak feto kompara ho mane tanba tuir estudu feto sira iha mudansa ba sira nia hormonal bainhira isin rua, partu bele halo sira depresaun nunee mos feto sira mos fasil ba fasilidade saude.

Tratamentu ba iha moras mental iha tipu tolu hanesan medikamentus, sicoterapia (koalia) no rehabilitasaun neebe disponivel iha fasilidade saude hotum Maibe ba sira neebe presiza halo rehabilitasaun tenke halo referal mai hospital hodi refere fali ba iha sentru rehabilitasaun hanesan PRADET inklui Laklubar.

Tenki hemu ai-moruk anti depresi lorloron tuir grau neebe iha too sintomas lakon. Basira sira neebe tama ona (bulak) tenke hemu aimoruk no sona lorloron too tempu naruk.

Atu prevene moras mental fisiku, social, spiritual tenke lao hamutuk se lae moras atan osan barak nee mos problema, osan laiha mos problema, osan barak lamoras maibe ispiritual lahalo nee mos problema.

Nia hateten fisiku signifika katak iha ai-han, deskansa diak, halo ezersisio, labele fuma, hemu tua.

Husi parete sociology katak hadomi malu, perdua malu, iha relasaun neebe diak ho familia ida seluk ispiritual, tenke hak besik-an ba Maromak liuliu reza hamutuk ho familia, rona misa semana-semana atu hadook hanoin negative sira no ense hanoin positive.

Alende halo tratamentu iha ospital sira hamos halo visita uma-kain hodi haree kondisaun pasiente liuliu sira neebe labele mai iha fasilidade saude halo observasaun direita ba iha supporta familia no kondisaun ambiente rasik.

    

Iha oportunidade nee nia husu familia sira neebe iha membru familia balun hetan moras mental tenke supporta sira halo tratamentu hodi rekopera fila fali. Ttanba governu halo ona investimentu ba tratamentu ida nee no disponivel iha fatin hotu.

Iha fatin ketak Doutor Herculano Seixas dos Santos nuudar   Director Saude Munisipio Ermera dehan, i fulan Janeiru too Julho 2017 liu husi programa saude da familia, sira konsege identifika pasiente moras mental hamutuk 25 no balun sofre moras epilipsi (bibi-maten).

"Ita hare pasiente sira nee agora submete ona ba iha tratamentu iha balun neebe sira tenke refere ba iha sentru rehabilitasaun Laklubar hodi hetan tratamentu intensive. Ita konsidera moras mental nee moras kronika neebe nia atu diak nee presiza tempu naruk no iha balun hanesan bulak bele permanente,” informa Herculano.

Tuir nia, pasiente balun neebe tinan naruk nia laran lahetan atensaun husi familia no familia sulan deit, maibe depois halo indentifikasaun no submete ba tratamentu komesa iha ona mudansa.

"Ita mos organizasa atividade konsulta espesialista kada fulan ho objetivu atu halo avalisaun ba sira nia tratamentu hodi bele halo asaun kontinua ba tratamentu,”esplika Herculano.  

Tratamentu moras mental iha Munisipiu Ermera lao diak tanba stok ai-moruk iha, pesoal sira disponivel, maibe problema falta kontribuisaun husi familia atu lori pasiente ba fasilidade saude.

Jeniche da Costa | Suara Timor Lorosae