Kampu Traballu Limitadu Dezempregu Aas

DILI – Kada Tinan escola universidades hotu-hotu kontinua produs intelktuais iha area oi-oin, maibe kampu traballu mos limitadu tebes atu kombate numeru dezempregu neebe mak kontinua aas iha rai laran.

Kestaun nee fo sai husi reprezentante povu iha uma fukun Parlamentu Nasional, Deputadu Paulo Moniz ba STL, Segunda (04/09/2017) iha nia knar fatin PN.

"Hau hanoin too ona tempu governu kria kondisaun, atu nunee bele kria servisu ba joven neebe dezempregu hela, maibe parte ida maka atu hadia ita nia moris maka, ita rasik tenke halo esforsu oinsa kria servisu ba aan rasik liu husi, atividade negosiu kiik sira nee,” informa Deputadu Paulo.

Nia mos informa tan katak, atu atu redus numeru dezempregu maka, joven sira neebe formadu tiha ona nee tenke orienta aan no book aan atu halo atividade ruma, hanesan fila liman, halo servisu hanesan ema agrikultor atu nunee bele hetan netik osan ruma.

Iha parte seluk Diretur Camara Comersiu Industria TL, CCI-TL, Nuno Trindade hateten, dezempregu aas tanba dependensia ba setor publiku nee boot tebes, no setor publiku maka durante nee loke kampu traballu ba Timor oan sira.

"Ita nia setor privadu sira seidauk bele kria kampu servisu ba ema barak tanba, atividade neebe setor privadu halo barak liu maka iha area konstrusaun, tanba nee projetu kuadu iha maka servisu ba joven mos iha maibe, projetu kuandu laiha dezempregu mos aas, tan nee governu tenke kria kondisaun,” informa nia.

Nunee mos Sekretariu Jeral KSTL, Jose da Concesao da Costa hateten, istimasaun husi KSTL ba forsa traballu iha TL hamutuk 400 ribu resin, no liga ba numeru dezempregu nafatin 11% tanba kada tinan forsa laboral nee tama iha merkadu traballu nee kuaze ema rihun 18 to 20, no liga ba merkadu la konsege absolve numeru neebe boot nee rasik.

"Hau hanoin numeru dezempregu iha TL sae tanba, governu rasik la seriu atu kontola iha baze, tanba dala barak kompania boot sira husi rai liu mai lori kedas sira nia ema, no ita haree servisu neebe ema liur halo nee Timor oan mos bele halo,” informa Sekratariu Jeral KSTL.

Nia mos hatuir tan katak, governu liu husi SEPFOPE halo ona esforsu boot liu husi kapasitasaun joven sira, atu kompete iha merkadu traballu, no atu rezolve problema dezempregu iha rai laran, save importante maka tenke hadia governasaun sistema informasaun konaba merkadu traballu.

Tuir Sekretariu Jeral nee katak, atu redus numeru dezempregu iha rai laran maka governu tenke, tau importansia ba setor privadu sira, maibe realidade neebe akontese katak, setor publiku maka fo servisu ba ema barak liu, duke setor privadu tan nee, governu tenke rezolve problema setor privadu tanba setor privadu sei hasoru hela problema kapital, no rekursu umanus. 

Madalena Horta | Suara Timor Lorosae