Produz Lei Proteze Simbolu Nasional

DILI – Bandeira Nasional hanesan simbolu neebe sosa ho ruin no ran, ema estranjeiru labele uja simbolu nee hodi modifika ba buat oin oin, sira neebe halo lei, presija kria lei ida hodi bele proteze ba simbolu hirak nee.

Deklarasaun nee, fo sai husi Diretor ezekutivu HAK Manuel Monterio ba Jornalista sira iha nia knar fatin Farol Kinta, (31/08/2017).

“Simbolu Nasional hotu hotu nee, ita hotu tenke respeita, liu liu sidadaun Timor oan, agora oinsa mak garante katak sidadaun hotu respeito Simbolu Nasional sira neebe saudozu sira sosa ho ran no vida, primera estar ukun nain sira neebe kaer ukun, liu liu Parlamentu Nasional tenke produz lei hodi proteze ita nia Simbolu Nasiona sira atu nunee, ema liu neebe tama mai atu halo investimentu, ida neebe mak tama ba produsaun ekonomiku no ida neebe mak la tama ba produsaun ekonomiku, ita mak tenke hateten tanba ita mak nain,” hateten Manuel.

Nia sublinha tan katak, “ema neebe mai husi liur, ita konvida sira mai no iha hanoin buat neebe halo osan, sira halo no la hatene buat ida. Parlamentu Nasional tenke halo lei ida atu proteze buat sira nee, laos halo uluk lei benefisia ba sira nia an, proteze sira nia an, duke halo lei hodi konserva no proteze simbolu nasional sira”.

Nunee presija iha lei atu bele asegura sasan sira nee, no halo fiskalizasaun lei neebe iha atu hare ema kumpri ka lae. Nunee husi fiskalizasaun Polisia mos halo, tanba sira halao lei no ordem nunee sira simu keixa konaba sed mak halo krime nee sira bele halo kapturasaun kedan.

Iha fatin seluk, finalista UNTL Vidal Magno hateten, sasan neebe sai hanesan simbolu, ema hotu tenke konsidera label uja fali sasan hirak nee, atu halo modelu oin oin laos bandeira deit, maibe ho mos tais.

“Laos iha deit lei atu regula ema neebe uja bandeira, halo ba modelu oin oin, maibe presija hare mos ba tais neebe modifika ba modelu neebe la tuir ita nia indentidade lolos. Presija tau konsiderasaun ba sasan no buat neebe reprezenta nasaun nia naran,” esplika Vidal.

Nia relata tan katak, governu foun presija tau atensaun ba kestaun sira nee, tanba agora dadaun ema Xineza komesa domina iha Timor, no modifika mos ropa balu no sasan balu tuir sira nia modelu. 

Terezinha De Deus | Suara Timor Lorosae