terça-feira, 17 de outubro de 2017

PM hatete katak la entende krítika ba programa ne'ebé hanesan programa hosi anterior Governu

PARTILHAR
Iha loron-segunda ne'e, primeiru-ministru timoroan hatete katak nia la entende krítika sira hosi partidu opozisaun boot, CNRT, ba programa Governu nian, ne'ebé ho objetivu haree ba polítika sira ne'ebé mai hosi programa sira hosi anterior Governu ka relasionadu ho "problema sira" ne'ebé mai hosi Ezekutivu anterior.

"Ha'u foin maka tama iha Governu fulan ida. Maibé sira hahú hamosu problema sira ne'ebé maka ami hetan", nia hatete ba Lusa iha intervalu ida hosi debate ba Programa Governu nian ne'ebé maka hahú iha loron-segunda ne'e iha Parlamentu Nasional.

"Ha'u la hatene katak sira hakarak to'o iha ne'ebé tanba sira rasik rekoñese katak ami kontinua nafatin programa sira hosi Governu anterior. Nune'e, saida maka hanesan problema", nia husu.

Governu dahitu, minoritáriu, hetan apoiu de'it hosi bankada sira Frente Revolucionária do Timor-Leste Independente (Fretilin) no hosi Partidu Demokrátiku (PD) - ho total deputadu na'in 30 iha Parlamentu Nasional ne'ebé iha fatin hamutuk 65.


Forsa opozisaun tolu - Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) - kontrola deputadu na'in 35 no iha semana liubá hakibur hamutuk iha Aliansa Maioria Parlamentar ida (AMP) ne'ebé hakarak sai hanesan alternativu ida hosi Governu bainhira programa hosi ezekutivu la hetan aprovasaun no Governu tuun.

"Sira mai duni hodi iha postura ida ne'e. Ha'u la hatene katak sei hatuun duni maibé hakarak halo konfuzaun", afirma hosi Alkatiri.

Bainhira husu hodi halo komentáriu ba kestaun ne'e, deputadu hosi CNRT Dionísio Babo - ne'ebé hanesan mós responsável hosi Komisaun Diretivu Nasional (CDN) hosi partidu ne'e - hatete ba Lusa katak "la'ós hanesan krítika ba pasadu" maibé hanesan preokupasaun sira "kona-ba saida maka sei akontese iha futuru" tanba "laiha medida konkretu sira iha programa ne'ebé maka aprezenta tiha ona".

Hatán kona-ba karik iha posibilidade atu CNRT la blokeia programa, Babo hatete katak "sei debate" kestaun ne'e.

Durante intervensaun oioin iha loron-segunda dadeer, deputadu sira hosi partidu sira opozisaun nian halo ona krítika sira ba elementu oioin hosi programa, dezde saida maka sira defini hanesan falta transparénsia to'o kesta jéneru nian, hosi tema ekonómiku sira to'o aposta iha aumentu hosi konseitu ekonomia sosial merkadu nian.

Intervensaun sira ne'e, liuliu hosi deputadu sira CNRT nian, dalabarak kestiona programa sira no projetu sira ne'ebé Governu dahitu esplika hanesan kontinuasaun hosi programa sira hosi ezekutivu anterior sira ne'ebé maka lidera ona hosi CNRT.

Kazu ida maka kriasaun hosi zona espesial hosi ekonomia sosial merkadu nian iha Oecusse - ne'ebé lidera ona hosi Mari Alkatiri ne'ebé agora nu'udar primeiru-ministru - no ne'ebé harii hanesan polítika hosi Governu anterior, ho baze iha lei ida ne'ebé aprova ho unanimidade iha anterior parlamentu.

"Sira halo krítika sira ba polítika ekonomia sosial merkadu nian. Maibé lei ne'ebé kria ZEESM aprova tiha ona ho unanimidade iha Parlamentu iha tinan 2014. Ha'u la obriga irmaun Xanana hodi kria ZEESM", Alkatiri hatete.

Xefe Governu hatán ba aspetu ida-idak ne'ebé deputadu sira husu, ne'ebé kestiona ona ezekutivu kona-ba aspetu oioin sira hanesan polítika saúde nian, fiskalidade, transparénsia no to'o kestaun hosi suku sira, divizaun administrativu ne'ebé iha Timor-Leste iha ekivalénsia ho freguezia.

Opozisaun akuza beibeik Governu ba "falta koerénsia ho konsisténsia" iha testu hosi nia programa, krítika ne'ebé Alkatiri husu ona detalle sira no informasaun, repete fali vontade hodi hakarak rona sujestaun sira hodi hadi'a testu.

Lei timoroan nian refere katak halo debate ba Programa Governu nian durante loron lima konsekutivu no bele vota de'it bainhira Governu aprezenta votu konfiansa ida ka opozisaun aprezenta proposta ida rejeisaun nian.

Programa sira hosi Governu rua ikus ne'e la hetan votasaun ruma, hetan debate maibé la hetan votasaun.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: