Polisia Vs Polisia, Notisia Ona MP

DILI - Kazu Polisia nain rua neebe halo agresaun fiziku ba malu iha loron (27/09), iha area Manleuana, Postu Administrativu Dom Aleixo, oras auto notisia hatoo ona ba iha Ministeriu Publiku (MP) hodi halo prosesa.

Tuir Segundu Komandante Munisipiu Dili, Superintendente Assistente Polisia, Euclides Belo dehan, dentru de akontesementu neebe akontese iha Manleuana, polisia nain rua halo agresaun fiziku hasoru malu, ida kriminalmente sira kontra artigu 145 kodiku penal. Agresaun  fiziku simples, e bele mos kona iha artigu 146 agresaun agravadu, tanba  artigu rua bele kona ba sira nain rua.

Kriminalmente akontesementu rezistu iha eskuadra Don Aleixo para prosesu nafatin, e rejultadu husi keixa neebe sira halo. Ita halo ona auto notisia ba Ministeriu Publiku, tanba Ministeriu Publiku mak kompetensia tomak atu fo notifikasaun ba suspeitu sira, para sira responsabilidade ba krime neebe sira halo,” dehan Euclides ba Jornalista iha nia knar fatin, Komandu PNTL Munisipiu Dili Caicoli, Sesta,  (06/10/2017).

Enkuantu Euclides hatete, ba membru Polisia neebe uza farda halo asaun iha Publiku hodi hamonu instituisaun PNTL nia naran, ida nee kriminalmente sira mos kona prosesu disiplinar nian.

Nia reforsa tan, kazu nee rezistu mos iha seksaun disiplinar PNTL nian, hodi kompleta sira nia dokumentus hodi notifika sira.

Sira tenke responsabilza asaun disipilnar iha komandu PNTL bainhira seksaun disiplinar halo notifikasaun ba sira, sira hatan ba PNTL ba disiplinar nian, enkuantu hatan ba tribunal  kestaun  krime, tanba nee sira  nian rua  hatan dala rua,” hakotu Euclides.

Tuir nia nia, komandu oras orienta ona seksaun investigasaun para bele halais prosesu ba suspeitu nian rua.

Iha sorin Seluk Akademika UNTL, Paulo ida Silva Soares dehan, nia sente triste uituan ba kazu refere tanba tanba ema pesoa sira iha problema privadu tenke uza farda estadu nia hodi ataka malu iha fatin publiku  hodi hafoer institusaun nia naran.

Hau triste no husu ba komandu tenke fote medida forte ba ema nain rua tantu suspeitu go vitima tanba halo foer instituisaun PNTL nia naran,” dehan Paulo.

Neemos Akademika UNTL, Francisco da Silva dehan, komandu tenke halo investigasaun klean no tenke foti sansaun forte ba sira nee hatudu imazen ladiak ba publiku liu liu ba membru sira seluk.

“Hau hanoin komandu tenke fo sansanun forte ba ema nain rua tantu vitima no suspeitu tanba sira hatudu imazen la diak ba publiku aat liu ba membru sira seluk,” dehan Francisco. 

Lucia Ximenes | Suara Timor Lorosae