Inséndiu Portugal: Governu Timor-Leste nian maka kontribui liu ba Revita, ho 1,2ME

Governu Timor-Leste nian maka hanesan entidade ne'ebé kontribui liu ba Fundu Revita, kriadu hodi jere donativu sira ba vítima sira hosi inséndiu ne'ebé akontese iha zona Sentru Portugal nian, ho osan euro millaun 1,2 resin.

Valor ne'e relasionadu ho 32% hosi total donativu sira ne'ebé fó iha osan ne'ebé rekolla hosi Revita to'o loron 30 Setembru, ne'ebé hamutuk euro 3.787.590,31 resin.

Tuir relatóriu trimestral dahuluk hosi fundu ne'e, entidade hamutuk 35 maka formaliza ona adezaun, entidade 27 halo donativu ho osan, entidade neen halo donativu ho sasán sira ne'ebé la sujeitu ba rejistu no entidade rua halo prestasaun serbisu nian.

Governu Repúblika Demokrátika Timor-Leste nian kontribui ona ho euro 1.249.901,41, banku sira Santander Totta ho Europeu Investimentu nian, ida-idak, ho euro 500.000 no Banku Komersial Portugés ho euro 424.485,73.

Komunidade Intermunisipal hosi Rejiaun Leiria nian fó ona euro 400.000, Fundasaun Montepio fó euro 253.626,49, Banku BPI, SA fó euro 147.881,35 no Fundu Revita simu hosi ANA - Aeroportu sira Portugal nian osan hamutuk euro 70.000.

Euro 61.000 resin simu ona hosi Banku Portugal nian, Casa de Portugal iha Makau apoia ho euro 50.000, BANQUE BCP, SAS ho 37.117, Grupu Salvador Caetano SGPS ho 22.785 no FNAC Portugal entrega ona osan hamutuk 20.453 ba Fundu Revita.

Simu mós kontribuisaun sira hosi FBS - Fundasaun Sosial Bankáriu, hosi federasaun Portugeza hosi Kolumbofilia, hosi Kordenasaun Ensinu Portugés nian iha Reinu Unidu no Illa sira Kanal nian, hosi Klube Portugés ba Família no hosi entidade sira seluk ne'ebé lakohi identifika ka fó folin ki'ik liu euro 5.000 no nune'e maka la diferensia iha relatóriu.

Aleinde donativu sira ho osan, iha mós kontribuisaun sira ho sasán ne'ebé maka laiha rejistu hosi entidade balun, entre sira maka Asosiasaun Emprezarial hosi Paços de Ferreira, IKEA Portugal, Molaflex Colchões SA, Molaflex Colchões SA, Fundasaun Jesus para a Paz no Mundo ho Direitos Humanos no CS – Coelho e Silva, SA.

Hanesan doasaun relativu sira ba prestasaun serbisu nian maka halo parte hosi Orden Enjeñeiru sira no PwC – PricewaterhouseCoopers & Associados – SROC, Lda.

Fundu Revita harii hodi jere donativu sira ba vítima sira hosi inséndiu sira iha zona Sentru Portugal nian, ida ne'ebé todan liu akontese iha loron 17 Juñu iha Pedrógão Grande, iha distritu Leiria, no halo ona pelumenus ema na'in 64 mate no na'in 200 resin kanek.

Inséndiu ne'e konsege hamate liutiha semana ida no alastra tiha mós ba konsellu portugés sira seluk hosi Castanheira de Pera, Figueiró dos Vinhos, Pampilhosa da Serra, Penela no Sertã.

SAPO TL ho Lusa