Opozisaun Hakarak Prepara VIII Governu

DILI: Partidu opozisaun iha Parlamentu Nasionál (PN) forma ona bloku ida ho naran Koligasaun Opozisaun Parlamentár (KOP). Bloku ne’e hetan maioria kadeira ho totál 35 ne’ebé kompostu husi partidu CNRT, PLP no KHUNTO.

Membru Parlamentu Nasionál ne’ebé koliga iha bloku ne’e mós asina ona karta ‘xamada’ ba Prezidente Repúblika, Francisco Guterres ‘Lú-Olo’ nu’udar bloku opozisaun maioria.

Iha karta ne’e bloku Koligasaun Opozisaun Parlamentár mós husu ba Xefe Estadu atu bele kria kondisaun hodi fó oportunidade ba bloku ne’e hodi hamosu VIII Governu Konstitusionál bainhira governu atuál la konsege kaer asegura estabilidade governativa.

Konteúdu hosi karta ne’ebé partidu tolu asina hodi entrega ba PR Lú-Olo tuir Konstituisaun RDTL artigu 74 pontu 1 ne’ebé hateten, “Prezidente-Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár”.

Haree husi karta ne’e, observadór polítika, Camilo Ximenes hateten, bainhira VII Governu ne’e monu iha tempu badak, Presidente Repúblika tenke bolu fali partidu segundu mais votadu ho ninia bloku bele mosu VIII governu.

Nia hatutan, bloku ne’e mosu la'ós ameasa de'it governu, maibé realidade hakarak atu hamonu duni VII governu atu hadau podér hodi ukun. Sira estabelese bloku opozisaun ne’e nia orientasaun atu ba ukun maski la pronunsia sai.

Nia hatutan, partidu ne'ebé atu forma governu Konstituisaun hatete ona tenke 33 deputadu iha Parlamentu Nasionál, hodi asegura sira-nia planu no programa.

Observadór ne’e konsidera, VII governu ne’e frajil no risku tebes, tanba iha PN demokratikamente minoria tenke submete ba maioria. Ne’e duni, difisil governu halo desizaun ruma.

Iha fatin seluk, Prezidente Bankada Partidu Libertasaun Populár (PLP), Fidelis Magalhães, objetivu bloku ne’e sai konsentrasaun polítika no entendimentu programa partidu tolu nian hodi diskute hamutuk iha bloku, sai programa ida ne'ebé lori moris di'ak ba povu hodi bele aprezenta ba nasaun.

“Ne’e konsentrasaun parlamentár husi partidu tolu ke sei aprezenta sira nia aan hanesan forsa parlamentár ida ne’ebé nia polítika konsentrada iha parlamentu ne’e,” dehan nia, iha Uma Fukun PN, Sesta (6/10).

Nia dehan, partidu tolu atu servisu hamutuk ne’e hodi define programa ne’ebé hanesan ne’ebé lori moris di’ak ba povu, defende interese nasaun.

“Agora ita hotu bele hamutuk para nune’e bele aprezenta alternativa programatiku ida ba nasaun”, dehan nia.

Konsentrasaun nivel polítika ne’e la’o di’ak loos no klareza hodi forma forsa polítika ida iha Parlamentu Nasionál.

Iha fatin hanesan, diáriu ne’e tenta konfirma ba Prezidente Bankada CNRT, Arão Noe de Jesus maibé lakohi fó komentáriu.

“Tempu ruma imi sei haree” dehan nia.

Karta konsentrasaun forsa polítika opozisaun iha Parlamentu Nasionál, aprezenta ona ba Prezidente Repúblika, iha Kinta (5/10).

Eugénio Pereira | Independente