DILI,
(TATOLI) - Xefe bankada Fretilín, Francisco Miranda Branco informa, semana oin,
Segunda (16/10) Sétimu governu sei aprezenta nia programa iha Parlamentu
Nasionál (PN).
“Aban
ami hetan ona kopia programa sétimu governu nian no ami sei diskute iha nivel
bankada hafoin iha loron 16 Outubru mak governu mai aprezenta iha Parlamentu
Nasionál,” Francisco Branco informa iha Parlamentu Nasionál, ohin.
Relasaun
ho karta petisaun hosi bankada opozisaun (PLP, CNRT ho KHUNTO) ba Prezidente da
Repúblika foin lalais ne’e, xefe bankada Fretilín, konsidera liu ona prazu. Nia
dehan, antes ne’e Prezidente da Repúblika konvida ona partidu sira ne’ebé hetan
asentu iha PN hodi rona sira nia hanoin no momentu ne’ebá la iha partidu ida
mak kontesta.
“Momentu
ne’ebá, Xefe Estadu, Francisco Guterres Lú Olo konvida partidu hirak iha asentu
parlamentár maibé la iha partidu ida atu kontesta no la iha ida mak dehan ami
iha governu alternativa, enkuantu, prosesu la’o ona, kuandu governu monu ita ba
eleisaun antesipada tanba ida ne’e mak konstituisaun haruka,” Francisco
Branco realsa.
Hodi
husu ba polítiku Nain sira bainhira halo polítika tenke tau as interese
nasionál. Hatudu responsabilidade polítika ne’ebé povu depozita ona basa povu
mak soberanu.
“Polítika
ne’e la’ós matemátika, la’ós aritmétika maibé tenke tau ás nafatin interese
Estadu no tenke iha benefísiu direita ba povu,” Branco fó hanoin.
Enkuantu,
Deputadu hosi Partidu Demokrátiku (PD), Manuel Tomás Amaral Carvalho alias Lito
Rambo reforsa katak, ema hotu iha direitu hodi espresa nia hanoin maibé labele
halo difamasaun, no labele ko’alia at ba ema.
Tuir
nia Prezidente Repúblika, Francisco Guterres Lú Olo iha ámbitu formasaun
governu hatudu kumprimentu ba konstituisaun RDTL basa antes Prezidente Lú Olo
hola desizaun konsulta ona partidu opozisaun.
“Tempu
Prezidente konsulta la iha ida mak dehan governu alternative, tanba ne’e agora
prosesu la’o ona, ita la bele fila ba kotuk,” Deputadu Manuel Tomás afirma.
Bainhira
fila fali ba kotuk, tuir deputadu PD ne’e, úniku solusaun mak eleisaun
antesipada, maibé ida ne’e mós akontese bainhira programa no orsamentu governu
nian la hetan aprovasaun hosi Parlamentu Nasionál.
Jornalista:
Zezito Silva | Editór: Manuel Pinto
Sem comentários:
Enviar um comentário