Estudu Iha Rai Liur, Fila Fali Ho Susesu

DILI - Ministru  Edukasaun no Kultura  (MEK) Rui Hanjam husu ba Timor oan neebe halao estudu iha rai liur, atu esforsu an estudu,  nunee aban bainrua remata fila ho susesu hodi bele servi povu no nasaun ida nee.

“Hau husu ba Timor oan neebe estudu iha rai liur, tenke fokus estuda,  nunee aban bainrua remata fila ho susesu hodi bele servi povu no nasaun ida nee,” dehan MEK Rui Hanjam liu husi nia diskursu iha serimonia despedida MEK- inan aman ho bolseiru 21 iha Edifisiu MEK  Vila-Verde,  Dili,  Sesta  (6/10/2017).

Ba bolseiru 21 neebe hetan oportunidade estudu iha Indonesia, MEK Rui Hanjam hatete katak bainhira to’o iha Indonesia sei hasoru dezafiu oi-oin, liu-liu   konaba kultura no lian, maibe oinsa mak husu ba bolseiru sira atu bele fokus  estuda, labele haree ema nian nasaun nee nabilan, depois  haluha  tiha  Timor.

“Hau  hanoin seremonia ohin loron nee importante tebes, para ita boot sira mai fali, bele reforsa ita nian edukasaun, liu-liu iha nivel peskas nian. Imi ba hetan apoiu, maibe apoiu nee laos apoiu osan deit, presiza apoiu motivasaun. Dala barak ita eskola iha liur nee, akontese ema la ho susesu, maibe laos tanba laiha lae, dala ruma motivasaun atu eskola nee mak laiha. Imi ba sei nurak, joven no klosan, imi tenke tau matan didiak ba imi nian eskola,” katak Rui Hanjam.

Nia mos hatutan katak foufoun bolseiru sira sei hetan dezafiu oi-oin, tanba nee tenke adapta ho ema ninia kultura no moris iha nasaun nee ba, atu nunee bele lao ba oin.

“Inan aman sira iha esperansa boot ida katak, abanbainrua remata estudu, bolseiru 21 tenke fila ho susesu. Ida nee tenke fo sai duni ba inan aman sira, atu nunee bele fo apoiu ba oan sira, tanba dala barak akontese, bainhira fila mai lori kedas ijasah rua,” dehan MEK Rui Hanjam.

Tuir MEK Rui, bolseiru sira nee estuda diploma 3 ka D3 ninian, no sira sei estuda tekniku vokasional iha area  peskas, neebe dala ruma bele too tinan rua ou tolu, tanba sira  ba  iha peskas  deit. Bolseiru sira nee sei tama iha politeknik hat.

Nunee mos reprezentante inan aman bolseiru, Francisco Baptista Belo hatete, nudar reprezentante inan aman hatoo agradese boot ba iha setimu governu, tanba bolseiru ida nee foin ba dahuluk iha setimu governu ninia, tanba nee, orgullu no agradese tebes ba MEK, ohin loron  bele halo  seremonia despedida ida nee.

“Hau nudar reprezentante inan aman hatoo agradese boot ba iha setimu governu ninia, tanba bolseiru ida nee foin ba dahuluk iha setimu governu ninia, tanba nee, orgullu no agradese tebes ba MEK, ohin loron bele halo seremonia despedida ida nee, imi tenke esforsu aan estuda,”dehan nia.

Serimonia despedida ba balseiru 21 nee hetan partisipasaun husi MEK Fernando Hanjam, vise MEK I no II Maria Lourdes Bessa, no Jose Neves, Direitor no xefi departementu, inklui inan aman bolseiru. 

Jacinta Sequeira | Suara Timor Lorosae