Francisco hatete katak Birmánia nia futuru liuhosi "respeitu ba grupu étniku tomak"

Papa Francisco konsidera ona, iha loron-tersa ne'e, katak Birmánia nia futuru liuhosi "respeitu hosi grupu étniku tomak", hafoin dirijente Aung San Suu Kyi kompromete ona hodi proteje direitu sira no promove toleránsia "ba ema tomak".

Iha diskursu ida ba autoridade sivil sira hosi Birmánia nia oin iha kapital administrativu, Naypyidaw, Francisco konsidera ona katak nasaun nia futuru liuhosi dame, harii "iha respeitu ba grupu étniku tomak no ba nia identidade", iha aluzaun ida ba minoria musulmanu hosi rohingya, ne'ebé maka nia la temi.

Antes, líder hosi governu birmanés no prémiu Nobel Dame nian deklara ona katak governu nai objetivu maka "destaka no "reforsa diversidade hosi Birmánia nia furak" hodi proteje direitu sira, promove toleránsia no garanti seguransa ba ema tomak".

Iha loron daruak ba vizita iha Birmánia, papa, dala ida tan, evita uza liafuan rohingya, hanesan akonsella ona, hodi evita insidente diplomátiku no relijiozu ruma.

Iha fulan hirak ikus ne'e, Francisco lamenta ona, dalabarak, situasaun hosi minoria musulmanu, ne'ebé ONU konsidera ona hanesan vítima hosi "limpeza étnika" iha Birmánia.

Membru sira hosi komunidade hamutuk 620.000 resin halai ona ba viziñu Bangladexe dezde fulan-Agostu, hafoin ofensiva ida hosi ezérsitu birmanés hodi hatán hasoru atake sira hosi rebelde rohingya sira.

Estadu birmanés, nasaun ida ho 90% resin hanesan budista, la rekoñese minoria no halo limitasaun oioin ba ema "rohingya" sira, liuliu ba liberdade movimentu sira.

Krizi ne'e hamosu ona krítika maka'as hasoru líder faktu Birmánia nian, Aung San Suu Kyi, ne'ebé hetan ona akuzasaun katak haluha ona Direitu Ema nian no tanba minimiza situasaun ne'ebé maka fó sai hosi vítima sira.

SAPO TL ho Lusa