quarta-feira, 29 de novembro de 2017

Agora Tenke Investe Iha Turizmu

KOVALIMA, (TATOLI) – Prezidente Repúblika, Francisco Guterres Lu-Olo fó hanoin atu Timor-Leste presiza investe iha turizmu istóriku tanba iha vantajen kompetetivu iha rejiaun Asian no pasífiku.

“Timor-Leste (Ita nia fatin) istóriku sira ho signifikadu espesiál oioin tanba bele dada turista mai Timor-Leste,” Xefe Estadu Francisco Guterres Lu-Olo realsa iha nia diskursu iha loron komemorasaun aniversáriu proklamasaun independénsia 28 Novembru ne’ebé realiza iha Munisípiu Kovalima, Tersa (28/11).

Presiza investe iha Turizmu tuir Lu Olo primeiru parte nu’udar investimentu ne’ebé bele hadi’a lalais kondisaun moris povu nian no bele mós kontribui ba harii empregu iha munisípiu hotu.

Seluk fali mak hamosu empregu signifika foin sa’e sira presiza iha asesu investigasaun ba siénsia, teknolojia no ba mundu negósiu nian atu sira bele kompete iha rejiaun no iha mundu.


Aleinde turizmu presiza mós tau matan ba setór sira seluk hanesan abitasaun. Iha parte ida ne’e  presiza polítika ne’ebé estavel atu buras ba beibeik tuir prinsípiu ne’ebé hatuur iha Konstituisaun Repúblika Demokrátika Timor-Leste.

Nune’e mós edukasaun, servisu saúde. Area rua ne’e iha impaktu boot ba objetivu atu halakon kiak no haburas Timor-Leste atu sai nasaun ho rendimentu aas to’o tinan 2030 bainhira ita satisfás ona nesesidade bázika populasaun nian.

Ba alkansamentu planu estratéjiku dezenvolvimentu Nasionál Lu Olo husu hadi’a no hasa’e kualidade servisu públiku ho determinasaun kompeténsia no haraik-an.

Ho ida ne’e de’it mak bele hametin pás no estabilidade prioridade mak haburas ekonomia ne’ebé sustentável hodi aproveita di’ak liután riku-soin nasionál no hamenus dependénsia hosi reseita mina rai nian.

Nune’e mós haburas ekonomia sustentável inkluindu valór no hasa’e agrikultór sira nia produsaun signifika Estadu fó atensaun ba maioria populasaun Timor-Leste.

Enkuantu haburas ekonomia sustentável signifika hasa’e kualidade no kuantidade produsaun agríkola ba konsumu iha rai laran no mós esportasaun.

Jornalista : Zezito Silva | Editór: Manuel Pinto

Imajen: Prezidente Repúblika, Francisco Guterres Lú Olo. Foto António Goncalves

Sem comentários: