Observador sira UE rekomenda aumenta kontrolu ba finansiamentu ba partidu timoroan sira

Misaun Observasaun nian hosi Uniaun Europeia ba eleisaun timoroan sira nian rekomenda aumenta kontrolu ba finansiamentu partidu sira nian, fó fali kompeténsia sira ba Komisaun Nasional Eleisaun nian no hametin lejislasaun eleitoral, haktuir hosi relatóriu ne'ebé divulga iha loron-sesta ne'e.

Ne'e hanesan rekomendasaun balun hosi rekomendasaun 22 hosi relatóriu, ne'ebé iha loron-sesta ne'e fó sai ba imprensa hosi eurodeputadac baska Izaskun Bilbao Barandica, xefe hosi misaun observador europeu sira nian ne'ebé marka prezensa iha Timor-Leste fulan lima ba votu prezidensial ho lejislativu.

"Eleisaun sira, prezidensial no mós lejislativu, organiza ona ho di'ak, transparente, inkluzivu ho iha dame", nia hatete iha loron-sesta ne'e iha enkontru ida ho jornalista sira iha Díli.

"Iha relatóriu ikus ami inklui rekomendasaun hamutuk 22. Koresponde ba instituisaun kompetente sira hodi desidi atu implementa ka la'e, tanba embaixada Uniaun Europeia (UE) prezente no hakarak kolabora hodi ajuda iha nia implementasaun", nia hatutan.

Iha semana ne'e, delegasaun ida ne'ebé lidera hosi eurodeputada vizita Timor-Leste hodi aprezenta relatóriu ne'ebé entrega ona ba instituisaun sira Estadu nian no ba partidu polítiku sira.

"Kampaña sira ba eleisaun sira hanesan pasífiku no respeita ona liberdade báziku sira. Maibé ami haree mós abuzu balun hosi vantajen sira hosi kandidatu sira ne'ebé iha kargu sira no uzu hosi rekursu sira Estadu nian, ho kazu balun intimidasaun nian hosi eleitoral sira", refere hosi eurodeputada.

Entre rekomendasaun hamutuk 22, Xabier Meilan (númeru daruak hosi misaun observasaun nian) destaka ona rekomendasaun hodi konsolida lejislasaun tomak iha Kódigu Eleitoral úniku ida no Regulamentu Eleitoral, hodi halibur pesa oioin hosi lejislasaun nian ne'ebé agora daudaun iha diploma oioin.

Fó fali ba CNE kompeténsia sira ne'ebé maka transfere ona ba Governu no evita mudansa ba kuadru legal eleitoral "durante intervalu hosi tempu ne'ebé defini loloos antes eleisaun sira", hanesan rekomendasaun sira seluk ne'ebé destakadu.

Tuir Meilan, mudansa sira ne'ebé akontese "iha fulan neen ka tinan ida antes prosesu eleitoral" bele hamosu "dúvida balun iha prosesu ikus" votasaun nian.

Nia hatete katak hanesan importante mós revizaun hosi "finansiamentu hosi partidu polítiku sira", ho diverjénsia maka'as hosi rekursu sira entre partidu boot rua (CNRT ho Fretilin) ho sira seluk.

Nia rekomenda iha área ne'e atu CNE tenki iha kompeténsia loloos ida hodi superviziona finansiamentu hosi partidu polítiku sira, aumenta rekursu sira hodi bele verifika.

Relatóriu ikus haree katak kuadru jurídiku kona-ba finansiamentu hosi kampaña sira "hanesan ladún kompletu" ho mamuk barak, hanesan ezemplu maka falta defini doasaun legal sira ka limiti kumulativu ida ne'ebé rekomenda "relatóriu loloos sira kona-ba identidade hosi doador ida no kona-ba folin sira ka serbisu sira ne'ebé simu".

"Lei la estabelese limiti máximu ba kontribuisaun sira hosi doador ne'ebé maka iha posibilidade hodi sai eleitu ka ba despeza hosi kampaña, nune'e hamosu diverjénsia boot ida entre kandidatu sira ho rekursu sufisiente no ho forsa polítika sira seluk", hakerek iha relatóriu ne'e.

Tanba ne'e, observador europeu sira rekomenda atu muda lei hodi obriga partidu sira hodi fó sai donativu sira kampaña nian, finanseiru no mós donativu seluk, no hodi defini limiti "razoável" ida ba kontribuisaun sira hosi ema ida fíziku ka jurídiku.

"Prosesu eleitoral hanesan transparente, garantista maibé bele haree duni katak sé maka iha liu rekursu sira iha liu posibilidade. Ne'e la'ós hanesan fatór úniku no parlamentu iha partidu foun rua ne'ebé, maski laiha rekursu sira ne'e, konsege ona iha partisipasaun ida", hatutan hosi Bilbao Barandica.

Iha kapítulu hosi administrasaun eleitoral, misaun rekomenda atu STAE hametin "kumprimentu prazu hosi serbisu legal ne'ebé previstu ba resenseamentu eleitoral", tanba observador sira konsidera katak la halo ho dalan adekuadu ba divulgasaun hosi kadernu eleitoral sira.

Formasaun di'ak ba reprezentante sira hosi partidu polítiku sira antes eleisaun sira, buka hametin atividade sira hosi informasaun síviku, inklui lori informasaun ba eskola sira no fatin sira seluk.

Iha fatin seluk, CNE "bele konsidera hodi hili asaun pró-ativu sira hosi kolaborasaun ho STAE hodi bele garanti kompetente ida supervizaun nian hosi prosesu eleitoral", loke nia sesaun plenáriu sira ba reprezentante polítiku sira, kandidatu sira no sosiedade sivil.

Relatóriu final inklui mós rekomendasaun hitu kona-ba media sira, hodi defende mudansa ba kódigu penal hodi halakon kastigu tanba "denunsia bosok sira" no definisaun hosi limiti sira ba publisidade eleitoral ne'ebé selu iha meiu komunikasaun estatal sira, ne'ebé tenki identifika loloos liu tempu sira antena nian.

Supervizaun asaun nian hosi órgaun sira komunikasaun sosial tenki liuhosi Komisaun Nasional Eleisaun (CNE) nian ba Konsellu Imprensa tanba seidauk hili medida ruma iha situasaun sira inkumprimentu nian hosi prinsípiu sira igualdade no imparsialidade nian.

Relatóriu haree mós katak meiu komunikasaun sosial oioin ne'ebé mantén estável iha fatin sira ne'ebé maka fó ba kandidatura oioin, la konta ho Rádiu Televizaun Maubere ho Televizaun Edukasaun (ne'ebé dedika ona tempu barak kobertura nian ba Fretilin).

SAPO TL ho Lusa