DILI, (TATOLI) - Linguísta,
profesór no literatura Timoroan, Abe Barreto “sadik” jornalista nomós eskritór
Cancio Ximenes-Cassimata atu hakerek tan romansa eh novel alende istória badak
sira no obra literária sira seluk tan, iha ámbitu apresiasaun livru ho
Cassimata nian ho títulu Eroi Loromatan husi sikun literáriu.
“Cancio Cassimata Ximenes hanesan
jornalista no eskritór-literáriu mosu ona iha ita-nia leet ho nia obra
jornalizmu, istória-badak no obra poétika sira. Ha’u, iha oportunidade
ida-ne’e, hakarak atu dezafia nia atu se bele, iha tempu oin mai, hakerek mós
romanse alias novel,” dezafia literatur timoroan Abe Barreto, iha salaun
eis-komarka Balide, Díli, horseik.
Abe Barreto haktuir, nia hahú
koñese Cassimata bainhira sei serbisu iha misaun ONU (Organizasaun Nasaun
Unida) hanesan durubasa, iha tinan 2000 nia klaran.
Hahú iha momentu ne’ebá mak nia
observa Cassimata nia obra jornalizmu sira iha jornál sira hanesan Timor Post,
STL (Suara Timor Lorosa’e), no seluk-seluk tan.
Nia interesadu tebes ho Cassimata
nia maneira hakerek artigu sira, ho estilu ensaiu literáriu. Iha momentu ne’ebá
ha’u ladun fó atensaun hodi lee nia obra istória-badak sira mak hahú publika
daudaun ona iha jornál sira mak ha’u temi tiha ona ne’e.
“Hosi ami-nia halo belun iha
mundu literáriu durante ne’e, ha’u deskobre katak afinál nia mós sai admiradór
ida ba ha’u-nia perkursu literáriu sira [lee poezia, etc]. No ha’u mós, hosi
amizade ida-ne’e, deskobre Cassimata sai nu’udar amante ida ba obra literária sira
hosi poeta no filózofu Libanés, Kahlil Gibran,” dehan linguísta ne’e.
Abe Barreto akresenta, Cassimata
nia prezensa iha perkursu literáriu Timor-Leste nian, hanesan jornalista no
eskritór-literáriu, hetan ona ninia espasu rasik.
“Ninia prezensa ne’e lori ha’u bá
hanoin hikas filafali figura jornalista nomós aumezmu tempu eskritór-literáriu
koñesidu sira-ne’ebé balun mate ona, no balun sei moris, mak hanesan: Mochtar
Lubis, Pramoedya Ananta Toer, Sitor Sitomorang, Goenawan Muhamad, Seno Gumira
Adjidharma hosi Indonézia, José Rodrigues Santos hosi Portugál, George Orwell
hosi Inglaterra, Albert Camus hosi Fransa no Arjélia, Gabriel Garcia Marques
hosi Kolombia, Eduardo Galeano no Mario Benedetti hosi Uruguai, no Ernest
Hemingway hosi Estadus Unidus Amérika,” katak Abe Barreto.
Kona-ba livru Eroi Loromatan ho
pájina 14 ne’e, Linguísta, profesór no literatura Timoroan, Abe Barreto nia fó
apresiasaun katak Eroi Loromatan oras ne’e mosu ona iha ita-nia leet.
Livru kolesaun istória-badak ne’e, atu oituan ka barak, sei haburas no hariku
liután duni ita-nia panorama literária Timor-Leste nian. Ne’e ksolok boot ida
ba ita hotu.
Ne’e orgullu boot ida mós ba
hakerek-na’in rasik. Ne’e obra ida mak merese duni atu ita hotu halo
apresiasaun no observasaun ba.
Istória-badak nu’udar jenre
literáriu ida maka furak atu ita esplora. Hanesan mós ho jenre literária sira
seluk, hosi obra istória-badak mós, ita bele hatene no observa lala’ok moris
sosiedade ida nian, iha periodu balun ida nia laran.
“Hosi istória lima maka ha’u
konsege observa no apresia ne’e, ha’u nota katak Cassimata mout iha hakerek ho
estilu doutrina literáriu maka naran realisme sosiál no surealismu,” nia
informa.
Nune’e nia esplika, iha
istória-badak “Maubere & Buibere”, Cassimata iha korajen lori leitór sira
mout iha ambiente istória kontemporania Timor-Leste nian, ne’ebé nakonu ho nia
midar no moruk.
Cassimata deskreve eroismu
personajen Maubere no Buibere nian ne’ebé iha fuan boot atu simu realidade
moruk katak sira na’in rua nia inan-aman mate la’ós iha forsa invazór sira-nia
liman maibé iha ita-nia liman kroat Falintil sira-nia liman. Liután ida-ne’e,
Cassimata lori ita mout iha reflesaun kona-ba hateke ba futuru ho espiritu
rekonsiliasaun.
Iha istória-badak Eroi
Loromatan, ita akompaña ambiente moris hanesan daduur iha tropa Indonézia nia
ukun. Personajen “ha’u” sofre kondisaun todan, hamutuk ho personajen Watumisa
no Bilesa.
Hosi personajen “ha’u”, Cassimata
hakarak atu haklaken mai katak, iha luta naruk ba libertasaun nasionál
ida-ne’e, ita liuhosi terus mak to’o ikus ita sei manan. Nosaun ida-ne’e, lori
ita hanoin hikas filafali moto Maun Boot Kay Rala Xanana Gusmão nian, “Resister
é Vencer”.
Iha istória-badak Lalehan Iha
Infernu Laran, Cassimata buka atu deskreve mai ita kona-ba ambiente trájiku
ne’ebé maluk balu enfrenta iha vila-laran durante tempu okupasaun, bainhira
besik atu hala’o konsulta populár iha tinan 1999. Interesante atu haree no nota
katak personajen sira iha istória ne’e nia laran enfrenta ambiente dilemátiku
entre “parede no espada”.
Iha istória-badak “Mundu Molik
Ona”, Cassimata lori ita atu haree tensaun entre hanoin vida modernu no vida
tradisionál, entre prezervasaun kulturál no abandonu kulturál. Interesante
tebes atu observa ambiente kulturál ema Makasa’e nian iha istória ida-ne’e.
No, ikus liu, iha istória
Uru-Watu, Cassimata lori ita atu refleta kona-ba ita-nia ezisténsia moris.
Liuhosi personajen “ha’u” maka ilustra hanesan kosok-oan ida iha inan nia kabun
laran, ita bele haree kontradisaun moris entre kaer metin valór morál,
reprezenta hosi parte kosok-oan no avó katuas, no mós abandona valór morál
reprezenta hosi personajen “ha’u”-nia inan, tanba realidade moris mak nakonu ho
susar. Iha istória ne’e, ita bele horon no koko sabór doutrina literária, maka
naran surealizmu.
Istória badak nakfilak sai filme
no drama
Linguísta, profesór no literatura
Timoroan, Abe Barreto espera hodi nota katak istória-badak sira-ne’e bele mós
foti no haktuir iha filme fiksaun ka halo ba drama.
Hodi nune’e, istória sira-ne’e
atinji liután audiénsia ne’ebé ampla. Ha’u dezafia maluk sineasta sira (film
maker sira) atu hala’o knaar ida-ne’e.
“Tanba sabór literáriu ne’ebé
furak, istória-badak sira-ne’e merese foti no uza hodi halo sai matéria ensinu
iha eskola sekundária no universidade,” nia fó hanoin.
Apresiasaun husi sikun Filozofia,
Padre Martinho fó komentáriu katak eskritór istória badak, puízia no romanse
sira ne’e la’ós de’it uza língua maibé nu’udar produtór ba linguajen sira.
Jornalista no eskritór Cancio
Cassimata hateten katak nia parte apresia ho apresisaun husi linguísta Abe
Barreto no Padre Martinho Gusmão, ne’ebé halo ona apresiasaun ba nia obra husi
sikun literatura no filozofia.
Jornalista: Rafy Belo | Editór:
Manuel Pinto
Imajen: Lansamentu livru Eroi
Loromatan husi Cancio Cassimata. Foto Espesiál
Sem comentários:
Enviar um comentário