PM Mari Husu Pedidu Kamra de Kontas Halo Auditoria

DILI - Primeiru Ministru Mari Alkatiri husu pedidu ba Kamra de Kontas, atu bele halo auditoria neebe sei hahu husi Rejiaun Adminstrativu Espesial Oecusse Ambeno (RAEOA).

Sekertariu Estadu Konsellu Ministru e Komunikasaun Sosial Matias Boavida hateten, Primeiru Ministru informa ba Konsellu Ministru tomak katak, Xefi Governu solisita ou husu ona pedidu ba Kamra de Kontas, Tribunal Superior Administrativu fisikal no Kontas nian hahu ona husu atu realize auditoria neebe sei hahu RAEOA.

“Ida nee ita nia Primeiru Ministru husu ona karta pedidu ba Kamra de Kontas atu bele hahu halo auditoria ba RAEOA, no laos ida nee deit maibe auditoria halo ba Ministeiru sira hotu,” dehan Sekertariu Estadu Matias ba jornalista sira, iha Palasiu Governu, Kuarta (07/02/2018).

Nia dehan, PM mos orienta ba Ministeiru sira hanesan Finansas, Turismu no Infraestruturas atu hahu solisita ba instituisaun neebe maka kompetente, atu hahu mos halo auditoria ba instituisaun hirak nee.

Iha biban nee Sekertariu Estadu Konsellu Ministru e Komunikasaun Sosial Matias haktuir tan katak, ho situasaun neebe iha orsamentu neebe iha sufsiente atu bele halao eleisaun antisipada.

Portantu situasaun iha Timor Leste entermus de demokrasia nia maduru tebes, mesmu iha impase politika, maibe Timor Leste konsege ultrapasa buat neebe maka iha rai seluk akontese  mos. 

Carme Ximenes-Maria Lay | Suara Timor Lorosae