Feto timoroan sira la konsege
nafatin pratika sira nia direitu iha Timor-Leste no, iha mundu rural, parte
barak serbisu nian lahó korespondénsia ba partisipasaun ativu iha ideia hosi
polítika sira dezenvolvimentu nian, afirma hosi Prezidente timoroan iha
loron-segunda ne'e.
Tanba ne'e, Francisco Guterres
Lu-Olo hatete iha diskursu ida iha Díli, katak "valoriza asaun feto sira
nian no promove nia partisipasaun iha konstrusaun nasional" hanesan
importante ba reforsu hosi "kualidade demokrasia nian" no ba defeza
Konstituisaun nian.
Lu-Olo ko'alia iha abertura hosi
semináriu ida kona-ba importánsia hosi feto nia votu, promove hosi organizasaun
timoroan Rede Feto ne'ebé hala'o iha semana rua antes hahú kampaña ba eleisaun
antesipadu iha loron 12 Maiu oinmai.
"Konstituisaun RDTL nian
estabelese prinsípiu igualdade hosi direitu sidadaun tomak nian, inklui
igualdade hodi direitu entre mane ho feto", nia afirma.
"Maibé, iha ita nia
sosiedade, feto sira seidauk iha oportunidade hanesan hodi pratika sira nia
direitu. Tanba ne'e, valoriza feto nia asaun no promove nia partisipasaun iha
konstrusaun nasional hanesan promove mós aplikasaun hosi Konstituisaun",
nia hatutan mós.
Hanesan hato'o mensajen ba líder
polítiku sira, Lu-Olo konsidera mós katak "partisipasaun polítika hanesan
direitu ida ne'ebé tenki loke dalan hodi hala'o direitu sira seluk: direitu ba
edukasaun, ba saúde, ba bee-moos, ba habitasaun", ne'ebé Estadu tenki fó
prioridade máximu ba tema sira ne'e no atu "feto sira tenki partisipa no
kontribui mós hodi hala'o direitu sira ne'e".
"Integrasaun maka'as hosi
Timor-Leste nia oan-feto sira iha prosesu dezenvolvimentu hanesan nesesidade
estratéjiku ida, hodi ita hetan objetivu sira hosi dezenvolvimentu sustentável
nian ne'ebé ita estabelese ona - inklui diversifikasaun hosi ekonomia nasional,
ne'ebé sei depende hosi ekonomia familiar ne'ebé di'ak iha área rural
sira", nia hatutan.
"Hodi hala'o objetivu sira
ne'e, ita tenki serbisu hamutuk, mane ho feto sira. No ita tenki aprende fó
valor justu ba importánsia hosi feto sira ba dezenvolvimentu hosi sosiedade no
ekonomia, iha Administrasaun Públika, iha área privadu emprezarial no iha área
rural sira, iha aldeia sira, kampu sira no iha mota-ninin sira, ne'ebé maior
parte hosi ita nia povu hela no halo sira nia serbisu", nia defende.
Prezidente destaka importánsia
hosi serbisu ne'ebé halo hosi dirijente no ativista sira hosi organizasaun sira
feto nian iha Timor-Leste no subliña importánsia hodi mantén no reforsa
parseria sira ne'ebé iha ona ho Estadu, hodi ajuda fortalese sosiedade sivil.
"Partisipasaun ativu hosi
feto sira no hosi organizasaun feto sira nian hanesan indispensável hodi
valoriza feto sira nia knaar ba konstrusaun nasional, loron-loron, iha nível
tomak: la'ós de'it iha polítika, maibé iha jeral, iha sosiedade, iha vida
familiar, iha sidade sira no iha aldeira sira, iha kampu sira no iha mota-ninin
hosi rai doben ne'e", nia afirma.
Xefe Estadu fó hanoin katak
tarefa família sira nian "kontinua iha feto sira nia liman laran" no
maski feto sira nia serbisu iha meiu rural hanesan "determinante ba
ekonomia hosi sira nia família", sira laiha nafatin "igualdade ba
kondisaun sira no laiha partisipasaun iha dezenvolvimentu hosi prioridade
nasional sira".
Iha ámbitu ne'e, nia destaka ona
falta saneamentu no bee-moos no feto sira ho labarik-feto sira ne'ebé, liutiha
tinan 15 independénsia, "la'o dook hodi karega bee ba sira nia uma".
"Liutiha tinan 15
independénsia, ha'u haree nafatin família rihun resin ne'ebé maka moris iha
habitasaun sira ne'ebé laiha kondisaun báziku mínimu sira. Situasaun ne'e afeta
mane sira ho feto sira. Maibé hanesan feto nia serbisu iha uma maka terus liu
tanba laiha kondisaun báziku sira hosi habitasaun sira hosi família sira iha
ita nia rai laran", nia hatete.
"Asesu ba informasaun ho
partisipasaun feto sira nian iha implementasaun hosi polítika sira habitasaun
nian, bee ho saneamentu, saúde públika ho edukasaun, hanesan prioridade
fundamental sira hosi ita nia dezenvolvimentu", nia afirma.
SAPO TL ho Lusa
Sem comentários:
Enviar um comentário