segunda-feira, 23 de abril de 2018

Autoridade Lokál La Satisfás Ho Servisu UPF-PM Iha Batugadé

PARTILHAR

BATUGADÉ, (TATOLI) - Xefe suku Batugadé, Januário Moisés konsidera katak autoridade seguransa Timor-Leste [TL] hanesan Polísia Militár [PM], UPF [Unidade Polísia Fronteira] no Migrasaun iha koordenasaun ne’ebé mínimu liu ho autoridade lokál sira, liuliu suku Batugadé, ne’ebé hela besik liña fronteira, entre TL no nasaun viziñu Indonézia.

“Liña koordenasaun diretamente, husi seguransa ba iha autoridade ne’e mínimu oi tuan, entaun, bainhira sira halo sira-nia atividade, sira-nia servisu iha liña fronteira, sira halo serbisu ba mai hela, maibé sira la halo liña koordenasaun diretamente ho autoridade, mínimu la halimar, tanba ne’e serbisu estadu ninian,” dehan xefe suku Januáriu Moisés ba Ajénsia TATOLI, iha Batugadé, foin lalais ne’e.

Xefe suku Januário hato’o kestaun ne’e, tan tuir nia, seguransa sira limita nia komunidade nia moris.

“Porezemplu hanesan hola modo tahan ilegál ki’ikoan mai, sira kaptura kedan para halo prosesu ruma. Maibé, entre nasaun Indonézia no Timor-Leste iha amizade ida ne’ebé mak di’ak para bele koopera malu ho di’ak para bele akompaña nasaun rua ne’e nia relasaun amizade, iha liña fronteira,” hato’o autoridade lokál ne’e.

Xefe suku Batugadé ne’e akresenta, seguransa importante iha liña fronteira tanba hanesan odamatan boot entre nasaun rua, Timor-Leste no Indonézia no reforsa mós katak komunidade nia moris mós importante, tanba ne’e presiza liña koordenasaun.

“Ha’u mak besik liu ho ha’u-nia komunidade, para oinsá ha’u-nia komunidade nia moris ne’e, buat ne’ebé kontra lei nasaun nian, la’o tuir nia prosesu, maibé buat negósiu ki’ikoan ne’ebé sira halo hodi sustenta sira-nia moris, husu para oinsá bele koopera hamutuk,” sujere xefe suku Januário Moisés.

Nia mós haktuir: “Sira dala ruma kaptura tiha ha’u-nia komunidade, hetan iha fatin ruma ne’ebé mak ha’u la iha, sira la mai halo liña koordenasaun, sira lori de’it, lori ba Maliana ka Suai, ne’e la iha liña koordenasaun entre autoridade”.

Tanba ne’e, lider komunitáriu suku Batugadé, Januário Moisés rekomenda ba governu foun tuir mai, husi partidu ne’ebé de’it mak hetan konfiansa husi povu atu haree preokupasaun ne’e.

“Ha’u rekomenda de’it, atu bele tau matan, liliu ba ha’u-nia komunidade. Ita hatene katak moris iha liña fronteira, atu nune’e bele sustenta, ha’u-nia komunidade nia preokupasaun, nia nesesidade iha ami-nia suku ida ne’e,” nia konklui.

Bazea ba preokupasaun ne’e, Ajénsia TATOLI tenta konfirma ho membru Polísia Nasionál Timor-Leste [PNTL] no migrasaun ne’ebé hala’o kna’ar iha liña fronteira, sira informa katak ierarkia másimu mak bele fó komentáriu, liuliu iha nivel munisípiu.

Jornalista: Rafy Belo | Editór: Manuel Pinto

Imajen: Membru Polisia Nasional Timor Leste wainhira halao apresentasaun iha kuatel jeral PNTL kaikoli, Dili 10 Febreiru 2017 hodi halo evaluasaun ba preparasaun seguransa kampanha no eleisaun Presidensial 20 Marsu 2017.Foto ANTIL/Antonio Goncalves
PARTILHAR

Author: verified_user

Publicação luso-timorense sem fins lucrativos

0 comentários: