MPF Konsege Alkansa Rezultadu Balun

DILI, (TATOLI) – Ministru Planu no Finansas, Rui Augusto Gomes, hatete iha fulan sira nia laran Ministériu Planu no Finansas (MPF) konsege alkansa rezultadu balun hanesan asegura implementasaun rejime duodesimál ne’ebé la’o ho di’ak durante fulan neen.

“Ha’u temi liafuan di’ak tanba defaktu ezekusaun orsamentál la’o ho efisiente no transparente. Laiha atrazu iha pagamentu no tusan balun mós ita konsege selu. Rejime duodesimál halo dala haat ona iha tinan lima nia laran. Maibe, ida ne’e nia tempu naruk liu kompara ho rejime duodesimál iha tinan sira liubá”, Rui hato’o ida ne’e iha biban despedida ho funsionáriu MF iha Aitarak-Laran, segunda ne’e ne’ebé TATOLI asesu iha portál MPF  nian.

Rui hatutan MPF mós fó pasu ida metin iha prosesu modernizasaun fonte reseita, liuhusi servisu Komisaun Reforma Fiskál nia koordenasaun ne’ebé Diresaun-Jerál rua nakfilak-an sai Autoridade mak Alfándega no Tributária. “Ida ne’e aliña ho ministériu ninian objetivu mak hodi alkansa transparénsia no funu hasoru ameasa korrupsaun”.

“Ita konsege integra sistema GRP (Planeamentu Rekursu Governu) ho sistema transferénsia automátiku (R-Timor). Pagamentu sira agora akontese iha real time no ba resipiente iha fatin ne’ebé de’it. Rezultadu ida ne’e hahú husi Vice-Ministra Sara nian empeñamentu bainhira sei iha Banku Sentrál. Susesu lansamentu ida ne’e atribue mós ba dedikasaun, preparasaun no kompeténsia xefe IFMISU no ekipa tomak”.

Aleinde ne’e konsege asegura asinatura akordu ba konstrusaun Portu Tibar no MPF rasik prezide serimónia entrega sertifikadu ambiente. Portu Tibar nu’udar parte ida husi Planu Estratéjiku Dezenvolvimentu ne’ebé buka atu fasilita komérsiu no promove dezenvolvimentu ekonómiku.

“Ita konsege konklui no lansa estudu balun ne’ebé sei sai baze ba foti desizaun polítika sira iha tempu tuirmai. Pur ejemplu, relatóriu kona-ba Avaliasaun PEFA kona-ba impaktu polítika fiskál ba redusaun ki’ak no dezigualdade nomós estudu foun ida naran Demographic Health Survey hamutuk ho ita-nian parseiru dezenvolvimentu ADB no USAID. Estudu sira ne’e halo iha ámbitu promosaun valór sira hanesan responsabilidade, transparénsia no desizaun bazeia ba evidénsia”.

Iha parte seluk ministériu mós bele mobiliza instituisaun Governu nian hodi halibur karreta (património do Estado) hodi fasilita Eleisaun Antesipada ne’ebé foin liu ona.

“Buat lubuk ida tan ne’ebé hatudu katak ministériu ida ne’e iha fulan sia nia laran la paradu ka halo de’it jestaun. Ba sira ne’ebé sképtiku ka gosta gossip, ha’u hakarak afirma iha ne’e katak ita asegura dunik funsionamentu Estadu ida ne’e, pagamentu saláriu, transferénsia públika, selu tusan, no seluk tan la’o on-time, ida ne’e la’ós de’it jestaun, maibé governasaun di’ak ita hatudu rigór iha konta Estadu nian, ita hatudu kontensaun iha despeza públika no la sakrifika parte ruma no konsege responde nesesidade Estadu to’o ohin loron”.

Maski ho difikuldade, MPF hamutuk konsege salvaguarda no asegura Estadu ida ne’e la tama iha krize nia laran. Nune’e husu ba funsionáriu sira atu kontinua empeñadu hanesan ne’e ba oin, tanba hatudu ona katak ekipa ida ne’e bele.

Jornalista: Maria Auxiliadora

Imajen: Ministru Planu no Finansa, Rui Gomes