Kualker Sidadaun Bele Husu Prosesu iha Tribunál

DILI, (TATOLI) - Prezidente Tribunál Rekursu, Deolindo dos Santos, hateten bainhira prosesu tama ona iha Tribunál, Lei Prosesu Penál artigu 75 permiti ba para kualker sidadaun ne’ebé iha interese bele husu ka bele hatene kona-ba prosesu ne’ebé la’o iha Tribunál.

“Bainhira akuzasaun tama iha Tribunál, ne’e prosesu públiku. Ne’e duni, sidadaun sira bele asesu no bele hetan mós sertidaun ba ida ne’e (prosesu),” Deolindo hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, relasiona ho líder partidu polítiku balun ne’ebé antes ne’e husu prosesu kandidatu membru Governu na’in 9 ba Tribunál.

Maibé, nia dehan, kestaun balun ne’ebé lei rezerva tenke hetan autorizasaun hosi Tribunál, ezemplu konkretu, sidadaun ruma ka jornalista ne’ebé tuir julgamentu labele halo gravasaun no karik halo gravasaun tenke hetan autorizasaun hosi juiz ne’ebé kaer prosesu.

Kona-ba lista kandidatu membru Governu balun ne’ebé Prezidente-Repúblika kestiona tanba deskonfia kazu iha Tribunál, Deolindo hatán, puramente ne’e kestaun polítika, tan ne’e, presiza trata entre koligasaun partidária ne’ebé manán iha eleisaun ho Prezidente-Repúblika para bele hetan solusaun.

“Ida ne’e laiha relasaun ho kompeténsia ne’ebé Tribunál rasik iha. Bainhira ko’alia kona-ba lista membru Governu, ne’e kompeténsia koligasaun ne’ebé manán eleisaun ho Prezidente-Repúblika atu trata ida ne’e,” Prezidente Tribunál Rekursu ne’e afirma.

Jornalista: Xisto Freitas | Editór: Manuel Pinto

Imajen: Prezidente Tribunál Rekursu, Deolindo dos Santos