Harii KIP investiga projetu anterior

Deputadu bankada FRETILIN, Aniceto Guterres, husu ba Parlamentu Nasional (PN) atu harii Komisaun Inkeritu Parlamentar (KIP), hodi investiga projetu infraestrutura sira ne’ebé VI Governu konstitusional halo iha fulan Jullu, 2017.

“Ami hato’o rekerimentu ba PN atu harii komisaun parlamentár ida hodi halo inkeritu ba ajudikasaun projetu infraestrutura sira, ne’ebé VI Governu konstitusional halo iha fulan Jullu, tinan 2017, loron balun de’it molok Eleisaun Parlamentar, tanba FRETILIN hakarak komisaun inkeritu ne’e atu apresia no esklarese responsabilidade Governu nian iha ajudikasaun ba projetu sira ne’e,” Aniceto Guterres liu husi komunikadu imprensa ne’ebé entrega ba GMN iha PN, Sesta (07-09-2018).

Tuir komunikadu ne’e haktuir, FRETILIN hakarak komisaun inkeritu parlamentar atu buka hatene kona-bá alegasaun sira ne’ebé hateten, mosu fallansu no ilegalidade iha selebrasaun kontratu ba projetu sira ne’ebé halo durante loron balun de’it, molok eleisaun parlamentar 2017.

“FRETILIN hakarak komisaun inkeritu parlamentar investiga montante osan ne’ebé Governu gasta ba kontratu ba projetu konstrusaun no reabilitasaun Estrada, ponte, kontrole Xeia no eletrisidade iha Timor-Leste no fonte finansiamentu ba kontratu hirak ne’e,”.

Entretantu prezidente PN, Arão Noe, konkorda mós ho desizaun partidu opozisaun FRETILIN atu halo inkeritu ba projetu 142 ne’ebé maka VI Governu halo iha, maibé sujere atu halo mós inkeritu ba prosesu pagamentu hahú husi loron 1 Janeiru to’o loron 31 Dezembru 2018.

“Durante debate OJE 2018 iha reklamasaun katak presiza halo inkeritu parlamentár ba projetu sira ne’e ha’u konkorda, tanba ne’e sei ajenda, mais ha’u lakoi halo limiti de’it ba 142 projetu iha VI Governu nian, tenki hala’o mós ba prosesu pagamentu sira ne’ebé halo ho OJE 2018, dezde loron 1 Janeiru ate 31 Dezembru 2018,” informa Xefi Lejislativu ne’e.

Nia akresenta, komisaun inkeritu parlamentár labele separa inkeritu ne’e ba de’it projetu balun, husik liu tiha projetu sira seluk, tenki ba projetu hotu hodi haree ninia legalidade, sé maka iha projetu nia kotuk, iha konflitu interese ruma ho orgaun balun karik, tenki verifika hotu. vês

GMN TV | Grupo Média Nacional