sábado, 13 de abril de 2019

Prezidente Repúblika Preokupa Intervensaun Polítika iha Independénsia Editorial


DILI, (TATOLI) - Prezidente Repúblika (PR), Francisco Guterres Lú Olo, preokupa ho fenómena ikus-ikus ne’e, kona-ba intervensaun podér polítika no podér ekonomia iha independénsia editorial iha órgaun no meius  komunikasaun sosiál Timor-Leste.

Media komunikasaun sosiál hanesan pillar da-haat iha demokrasia no Konstituisaun RDTL artigu 40 ho 41 mós fó espasu legal hodi garantia  liberdade espresaun no liberdade imprensa iha nasaun ida ne’e.

“Espera katak, pillar da-haat husi demokrasia ida ne’e, la bele sai fali podér husi podér tolu seluk (legislativu, ezekutivu ho judikativu)”, hateten Prezidente Conselho de Imprensa, Virgilio da Silva Guterres.

Liuhusi audiénsia ho Konsellu Imprensa Timor-Leste (CI-siglaportugés) iha Palásiu Prezidénsia Nicolau Lobato, Bairru Pité, Dili, ohin, Prezidente Repúblika, Francisco Guterres Lú Olo, husu atu CI ho nia estrutura atu kontinua hala’o servisu ho didi’ak, liuliu kontinua foku atensaun ba kapasitasaun rekursu umanus jornalista timoroan sira nian atu hala’o sira nia knar jornalistiku ho profisionál liu tan.

Prezidente Repúblika mós husu atu CI kontribui haklaken edukasaun sívika kona-ba papél media nian iha sosiedade demokrátiku, atu oinsá mak bele aproveita didi’ak meius komunikasaun sosiál hodi ejerse nia liberdade espresaun no mós aproveita didi’ak rede sosiál  ba valores pozitivu no konstrutivu.

Intermus utilizasaun rede sosiál, Prezidente CI, Virgilio da Silva Guterres, mós informa ba Prezidente Repúblika   kona-ba “mata dalan” ne’ebé CI prodús ona  ba jornalista timoroan sira oinsá mak utiliza rede sosiál (Facebook) hanesan profisionál jornalista atu la hamosu diskursu ódiu no afeta ba nia integridade hanesan  jornalista.

Foin lalais ne’e, CI hamutuk ho nia parseiru  UNESCO fasilita prodús ona “mata dalan” utilizasaun rede sosiál ba    profisionál jornalista sira ne’ebé haruka ona ba Jornál da Repúblika hodi tama iha em vigor.

“Mata dalan ne’e ami halo atu  jornalista sira uza meius rede sosiál hanesan jornalista ne’ebé tenke hatudu duni ninia karater jornalista. La’ós, hala’o tiha knar jornalista pois hakerek iha estatus Facebook hanesan fali ema polítiku no ajitador polítiku sira. Ami halo konsultasaun hotu ona ho jornalista sira, asosiasaun jornalista sira no media na’in sira kona-ba mata dalan ne’e no lori ona ba Jornál Repúblika atu publika iha tempu badak nia laran”, hateten Virgilio Guterres.

 Prezidente CI, Virgilio da Silva Guterres, ne’ebé akompaña husi membru CI, Francisco Belo Simões da Costa, Diretora Ezekutiva Ana Teresa Sequera, asesór programatiku Rigoberto Monteiro, ho Angelina M.G.A. da Silva, nudár funsionáriu CI,  partilla ho Prezidente Repúblika  kona-ba progresu no kooperasaun servisu sira mak durante ne’e CI halo ona, inklui dezafiu balun mak CI enfrenta durante ne’e.

CI nia kompeténsia mak promove liberdade espresaun no liberdade imprensa,  promove independénsia ba meius komunikasaun sosiál, asegura asesu jornalista sira iha hala’o sira nia atividade jornalístika, inklui  promove no asegura kualidade profisaun jornalístika nian.

Conselho  de Imprensa nu’udar pesoa koletiva ida direitu públiku nian, ho natureza entidade administrativa independente, hetan autonomia administrativa finanseira no ho patrimóniu rasik, (Artigo 1.° Estatutu Conselho Imprensa).

Prezidente CI, Virgilio da Silva Guterres, ba jornalista sira hafoin hasoru malu ho Prezidente Repúblika, klarifika katak,  CI halo enkontru ho Prezidente Repúblika  hodi  konvida Prezidente Repúblika atu halo enserramentu ba eventu internasionál Forum Diálogu Dili (DDF-siglaingles) ne’ebé mak CI organiza iha loron 9 to’o loron 10 fulan Maiu, tinan-tinan.

Prezidente Repúblika ho ‘onra’ boot  aseita pedidu no konvite CI nian ne’e atu partisipa no halo diskursu iha enserramentu ba serimónia DDF ne’e, inklui sei fó mensajen Estadu nian kona-ba  situasaun balun mak Prezidente Repúblika anota hela iha ámbitu Liberdade Espresaun no Liberdade Imprensa liga ho preokupasaun notísias falsu (hoax), diskursu ódiu, ajitasaun,   diskursu insendiáriu no seluk-seluk tan.

“Iha tinan kotuk ami organiza DDF hodi husu Prezidente Repúblika halo enserramentu, maibé la biban tanba preokupa ho situasaun polítika ita nian momentu ne’ebá tanba ne’e Prezidente Repúblika delega Xefe Casa Sivíl mak reprezenta Prezidente Repúblika. Maibé, ba dala ida ne’e, ami kontente tanba Prezidente Repúblika disponivel ona atu marka prezensa hodi ko’alia buat balun ba ita jornalista sira hotu no partisipante DDF husi nasionál ho internasionál sira hotu”, hateten Prezidente CI, Virgilio da Silva Guterres.

Virgilio Guterres haktuir mós PR Lú Olo nia preokupasaun balun, liuliu liga ho intervensaun podér polítika ho podér ekonomia iha independénsia editorial, ne’ebé fó ameasa boot independénsia meius no órgaun komunikasaun sosiál sira nian atu hala’o nia knar ho balansu no independente.

Forum Diálogu Dili ne’e, tinan-tinan CI organiza iha Dili, hodi konvida reprezentante  órgaun reguladór sira iha Sudeste Aziátiku no Pasífiku, hodi partilla informasaun ba malu no fahe esperiénsia ba malu   kona-ba situasaun nasaun ida-idak nian entermus  promove liberdade espresaun no liberdade imprensa.

EKIPA

Imajen: Prezidente Repúblika (PR), Francisco Guterres Lú Olo, hasai foto ho Prezidente CI, Virgilio da Silva Guterres ho nia membru no ezekutiva CI nian, hafoin audensia iha Prezidénsia Nicolau Lobato, Bairru Pité, Dili, Sesta (12/4/2019). Imajen/CI

Sem comentários: