Iha
tinan sanulu resin tolu (13), Governu gasta ona osan biliaun US$ 8 ba
dezenvolvimentu, maibe realidade laiha liu balansu entre orsamentu ho rezultadu
dezenvolvimentu, basá povu kontinua halerik ba nesesidade bázika.
Ekonomista
nu’udar mós Jurista, Manuel Tilman dehan, Governu gasta ona osan biliaun US$ 8,
maibé nia rezultadu la serve ho osan ne’ebé sira gasta.
“Ida
ne’e ita mo’e laiha. Ita orgulhu dehan katak, la’o diak, maibé nasaun moras
hela ne’e. Ha’u orgulhu kuandu ha’u gasta finanseiru atus ida hodi hetan fali
rendementu atus rua, maibé ha’u gasta atus ida atu hetan deit sanulu ka rua
nulu, ida ne’e ha’u beik,” dehan Manuel Tilman ba Jornalista sira iha nia kna’ar
fatin Hotel Hotel Beach Garden, Kinta (21/5), relasiona ho diskursu Prezidente
Repúblika, Taur Matan Ruak nian iha komemorasaun independensia ba dala 13
Munisípiu Bobonaro, ne’ebé hatete katak, dezenvolvimentu iha Timor Leste iha
mudansa bo’ot.
Nia
haktuir, Governu gasta rihun ba rihun ba setor hotu hodi dezenvolve aan, maibe
rezultadu laos fahi maibé manu inan ida. Se nia rezultadu ne’e fahi karik, se
bele oan netik, maibé tanba manu, entaun tolun deit.
Eis
Deputadu Parlamentu Nasional iha segundu lejislatura fo ezemplu katak,
Indonesia durante tinan 24 iha Timor Leste, sira gasta deit milaun 500, maibé
halo buat barak, estrada sira nian ne’e mós sei dura hela to’o ohin loron, TL
nian foin halo ohin, aban laiha ona.
Ba
nia, sestu Goveru ne’e, forsa laiha atu halo bo’ot buat ida, Ministru sira
lor-loron mak iha deit Munisípiu, povu mak basa liman hodi han nasi bungkus,
bainhira mak sira bele servisu.
“Ita
tetu tok ho osan biliaun US$ 8 ne’e ho estrada ne’ebé mak iha, ida ne’e ita
tenki tanis, Governu dehan halo, mas iha ne’ebé,”relata Tilman.
Iha
parte seluk, Diretur Ezekutivu Asian Justice And Right (AJAR), José Luis de
Oliveira sekunda, dezenvolvimentu ne’e iha, maibe ho diskriminasaun.
“Ha’u
mós rekoñese katak, dezenvolvimentu ne’e, ejiste duni. Maibé infelismente,
dezenvolvimentu ne’ebé akontese, dezenvolvimentu fiziku deit,”katak José Luis
de Oliveira.
Tuir
nia, dezenvolvimentu ninia sentidu lolos ne’e, dezenvolve ema. Projetu fiziku
sira ne’ebé mak Governu halo ne’e, atu aumenta valor umanu. Labele halo fali
dezenvolvimentu fiziku mak la’o lais liu, dezenvolvimentu umanu atrazadu liu.
“Se
ita hakarak sukat dehan katak, dezenvolvimentu ne’e la’o ba oin mak ne’e, setor
edukasaun, setor Agrikultura no setor ekonomia. To’o iha ne’ebé ona, ita ema
Timor-oan sai independente, to’o iha ne’ebé ona ita ema Timor-oan, kaer kuda
talin rasik,”tenik José.
Maibé
kuandu sura deit katak, Governu halo ona estrada hira no sosa ona kareta hira,
ida ne’e laos dezenvolvimentu ida ne’ebé los. Dezenvolvimentu ida importante
ne’e, mak, tenki dezenvolve ema ninia kualidade, kapasidade no kuñesementu. tap
Jornal Nacional
Sem comentários:
Enviar um comentário