BISPO MALIANA HATO’O PROBLEMA INFRAESTRUTURA BA PM

Bispu Diocese Maliana, Dom Norberto do Amaral, Pr aprezenta ba Primeiru Ministru (PM) Rui Maria de Araújo, problema infraestrutura, ne’ebé sai problema prinsipál ba povu Munísipiu Bobonaro.

Bispu Dom Norberto informa kestaun ne’e ba Xefi Governu Rui Maria de Araújo, wainhira Primeiru Ministru ho nia espoza vizita Amo Bispu Dom Norberto Amaral, iha nia rezidénsia Paço Episcipal Maliana, Kuarta feira (20/05), hafoin partisipa komemorasaun restaurasaun independensia Timor Leste (TL) ba dala 13 iha Munisípiu Bobonaro.

Vizita Xefi Governu ne’e, hanesan jestu ida atu Primeiru Ministru, komprimenta Amo Bispu tanba depois ninia (PM Rui, red) tomada de posse, nia parte seidauk komprimenta Amo Bispu.

“Ha’u mai vizita Amo Bispu iha Diocese ne’e (Maliana, red) hato’o Governu nia disponibilidade para servisu hamutuk ho igreja inklui Diocese Maliana. I agora dadaun ne’e mos Governu fó apoiu hela ba projetu sira iha igreja ne’ebé agora ami atu ba vizita Koléjiu Maliana, depois ba vizita rezidénsia Bispu ninia no mós asrama Madre sira nian iha parte Tunu Bibi nian ne’ebé hetan apoiu husi Governu ne’ebé ami atu ba vizita mós”, informa Rui Araújo ba Jornalista sira hafoin hasoru malu ho Bispu Maliana.

Xefi Governu ne’e mós haktuir katak, Amo Bispu Maliana hatudu ninia kontentamentu ba vizita PM nian no prontu atu servisu hamutuk nafatin hodi hala’o prosesu dezenvolvimentu TL nian ba oin.

“Agora dadaun ne’e área infaestrutura mak Amo Bispu haree katak, área ida ne’ebé importante liu halo, tanba Diocese foun ne’ebé desde Governu anterior mai, ne’ebé eis Primeiru Ministru Xanana fó ona apoiu ba infraestrutura. Ne’ebé ami sei hametin liu tan área infraestrutura iha Maliana”, dehan Rui Araújo.

Alénde ne’e PM Rui Araújo mós fundamenta katak, Governu mós sei fó apoiu ba konstrusaun Katédral Maliana ne’ebé oras ne’e dadaun iha planu Diocese ninia.ixo

Jornal Nacional