PM RUI ENKONTRU ESPECIAL HO ALKATIRI

Primeiru Ministru, Rui Maria de Araújo halo enkontru especial ho Sekretáriu Jerál Partidu FRETILIN, Marí Bim Amude Alkatiri, iha Timor Plaza horseik.

Enkontru especial ne’e, PM Rui Araújo halo ho Alkatiri, hafoin Xefe Governu ne’e realiza uluk enkontru especial ida ho autoridade sira husi defeza no seguransa iha Palacio Governu, Kuarta (12/8).

Bainhira Xefe Governu ne’e remata enkontru ho autoridade defeza no seguransa iha Palásiu Governu, PM Rui Araújo kontinua hakat liu ba Timor Plaza, hodi hasoru malu ho Marí Alkatiri. PM Rui Araújo sai husi Palásiu Governu liu husi dalan diresaun Praia dos Coqueiros nian.

Rui Araújo halo enkontru segredu ho eis Primeiru Ministru Alkatiri, kuaze minutu tolu nulu nia laran.

“Ha’u mai konsulta ha’u nia moras,”informa Primeiru Ministru, Rui Maria de Araújo ba jornalista sira ne’ebé hamrik hein hela iha Timor Plaza.

Maske Rui Araújo rezeita nia enkontru especial ne’e ho Alkatiri, maibé hafoin Xefe Governu ne’e sai husi Timor Plaza ho nia kareta akompaña husi nia kareta eskoltu sira, jornalista sira hakbesik an ba ema sira ne’ebé mak servisu iha ne’eba hodi husu katak, iha ne’e (Timor Plaza) klinika iha ka.

Hatan ba jornalista sira nia pergunta ne’e, ema sira ne’ebé haree PM Rui Araújo tama hasoru Alkatiri hatete katak, Primeiru Ministru ohin hasoru malu ho Mari Alkatiri.

Enkontru ne’e mós taka ba staff ZEESM ne’ebé servisu hamutuk ho Marí Alkatiri. Tuir informasaun ne’ebé jornalista sira rekolla iha resepsionista Timor Plaza nian katak, Primeiru Ministru Rui la’os ba konsulta moras, maibé hasoru Prezidente ZEESM, Marí Alkatiri.

“Iha ne’e iha duni klinika Portugal nian, maibé Primeiru Ministru mai la tama iha ne’e, tama ba odamatan ida Doutór Marí nian,”informa ema ne’ebé haree Xefe Governu ne’e tama ba hasoru malu ho Alkatiri.

Nia hatutan, se Primeiru Ministru ohin mai konsulta karik, nia atu mai iha klinika ida ne’e maibe la mai.cos

Jornal Nacional