INVOLVE IHA VI GOVERNU, FRETILIN SEI SIMU KONSEKUENSIA BO’OT IHA 2017

Ezistensia VI Governu ne’ebé Xefia husi Primeiru Ministru (PM), Rui Maria de Araújo, sei fó impaktu bo’ot ba Partidu FRETILIN hodi hetan votus iha 2017, tanba FRETILIN la kumpri ninia promesa ne’ebé nia promete ona ba povu hodi monu ba polítika partidu CNRT atu ezekuta fali CNRT nia polítika iha sestu Governu ida ne’e.

Eis Prezidente Partidu Sosial Demokrata, Mario Viegas Carrascalão konsidera Primeiru Ministru (PM), Rui Maria de Araújo ne’ebé husi Partidu FRETILIN, laiha forsa polítika.

“Sira rasik halo deklarasaun katak, tama iha Governu ne’e hanesan individu, ne’e duni halo sala ka halo loos, iha impaktu ba partidu. Ha’u hanoin partidu FRETILIN sei hetan konsekuensia bo’ot, tanba primeiru la kumpri sira nia promesa ne’ebé ke atu hato’o ba povu katak iha kadeira 27 ka 28, ida ne’e sira la kumpri, tanba sira ba implementa fali programa partidu seluk nian hanesan CNRT nian, povu konkrodaida ne’e,” dehan Mario Carrascalão ba jornalista sira iha Hotel Timor Dili, Kinta (0/9).

Rezultadu husi remodelasaun ne’ebé deside husi Xanana Gusmão, Carrascalão dehan, ida ne’e la fó impakatu ba estabilidade, maibé FRETILIN mak sei simu konsekuensia bo’ot.

“Ita haree tempu Doutór Rui Araújo nian ne’e, ha’u hatene katak avansa la avansa,no hakiduk ne’e la hakiduk, estavel hela, miabé defisil duni, tanba nia kaer Governu ne’e, tama ona iha dalan klaran, Ministru sira ne’ebé tama ne’e mós haktuir de’it progarama ne’ebé iha ona, ne’e duni ne’e la’os sira nia programa rasik, ema seluk mak kria tiha programa, entaun sira kontinua de’it,”katak Carrascalão.

Tuir Carrascalão nia observasaun katak, situasaun agora ne’e oin seluk, hafoin mosu VI Governu konstitusional.

“Ha’u haree korrupsaun la diminui, tanba kazu foun tama iha tribunal ha’u la haree, ha’u haree mak kria ona dependensia, KAK agora ne’e dependensia polítika ba Governu. Loloos KAK ne’e tenke independente ho loloos, Governu atual halo sala mós KAK labele evita,” afirma Carrascalão.

Nia haktuir, PM Rui Araújo sei la konsege halo buat ida, tanba Xanana nia poder iha sestu Governu ida ne’e nia laran, bo’ot nafatin.

Carrascalão haktuir, kuandu hakarak hadi’a Governu liu husi remodelasaun, Xanana nia naran labele tama iha lista Governu, tanba kuandu Xanana nia naran iha, poder ne’e sei iha nafatin nia liman.

“Sira bé hili FRETILIN tanba gosta programa FRETILIN nian, agora FRETILIN la implementa programa rasik, la luta implementa ida ne’e, povu bele konkorda,” tenik nia.

Carrascalão haktuir, kuandu situasaun ne’e la’o nafatin hanesan, atu halo oinsa mós, FRETILIN sei hetan konsekuensia negativa, tanba ema nota ona katak, FRETILIN sa’e ba ukun mós, la halo buat ida.

Carrascalão afirma katak, Governasaun PM Rui sei labele halo duni buat ida iha nia mandatu ne’e, tanba nia laiha poder.

Carrascalão fó ezemplu katak, agora ne’e dadauk ne’e mós, kuandu Xanana ko’alia, ministru sira hotu amen deit, laiha iha atu kontra.

“Dr. Rui ko’alia, ministru sira hotu ne’e hatene se mak manda, ami ba besik mak katuas Xanana, ne’eduni mak ha’u hatete, kasian Primeiru Ministru Rui, ha’u senti katak, halo nusa mós ema ida hanesan Dr. Rui Araújo ne’e, bele hanesan ne’e, i nia sei hetan konsekuensia negativu,” afirma Carrascalão.

Nia dehan, baut hotu la’o sabra’ut, tanba Primeiru Ministru Rui Araújo lahetan poder atu manda buat hotu.

“Kuandu ita la kumpri saida mak ita promete ba povu, laiha kastigu seluk ba partidu ne’e, anaun ser liu hosi eleisoens.O promete ba povu la realiza, povu la hili o,” dehan Carrascalão.cos

Jornal Nacional