KFP SEI AUMENTA SALARIU FUNSIONARIU

DILI - Prezidente  Komisaun Funsaun Públika (KFP), Komisáriu Faustino Cardoso hanoin ona atu aumenta saláriu ba funsionáriu públiku sira ne’ebé iha prestasaun servisu di’ak.

“Kona-ba ida reforma seidauk, ami fokus ba proposta dekretu governu, kona-ba distinsaun no premius ba funsionárius públikus no instituisaun sira ne’ebé mak hatudu dezempeñu servisu excelente ba iha públiku,” Prezidente KFP, Faustino Cardoso ba jornalista sira, iha Palásiu Governu, Tersa (01/9).

Nia dehan tan KFP aprezenta proposta dekretu governu ba governu ho objetivu fó rekoñesementu ba ema ne’ebé servisu iha instituisaun públika no instituisaun estadu ne’ebé mak hatudu duni dezempeñu servisu di’ak ba públiku.

Tanba to’o ona tempu  valorizasaun funsionáriu  sira exemplar ne’e, maibé hanoin hirak ne’e sei iha proposta.

Rekuñesimentu ne’e mós bele ho maneira oi-oin, no fó sertifikadu no tau nia naran iha jornal públiku hodi ema hotu hatene, no fó medalla ne’ebé hanaran, merítu da funsaun públika no fasilita tan intermus de osan no  material.

“Klaru katak, sei fó implikasaun ba aumentu de saláriu, tanba ita rekoñese no valoriza ema hosi osan, no osan ne’e atribui ba nia saláriu. Signifika, durante ne’e nia saláriu ki’ik, maibé tanba nia hatudu prestasaun servisu no dezempeñu di’ak, nia sei hetan ninia aumentu salarial,” Prezidente KFP esplika.

Maibé nia dehan ida ne’e foin mak ideia ne’ebé Komisaun Funsaun Públika aprezenta ba Konsellu Ministrus, para Membrus Governu sira mós halo diskusaun klean liu tan ba proposta ne’e, atu nune’e bele aplika abilidade ba iha rejimentu espesial sira.

Iha fatin hanesan, Sekretáriu Estadu Konsellu Ministru, Avelino Maria Coelho hatete, proposta ne’e foin halo apresiasaun seidauk halo aprovasaun final.

Tanba ne’e KFP sei aprezenta fali proposta lei iha semana oin, nune’e posibilidade aprova ka kontinua adia.

Timor Post