PM Rui: Poupansa La Signifika Selu Saláriu Ne’ebé Ki’ik

Primeiru Ministru, Dr. Rui Maria de Araújo hateten katak nia halo kompromisu atu evita ”DESPEZA SUPERFLUA” ne’ebé la hanesan ho poupansa. Maski nune’e, tuir nia, poupansa mós la signifika de’it selu salário ne’ebé ki’ik.

“Ha’u halo kompromisu atu evita ”DESPEZA SUPERFLUA” ne’ebé la hanesan ho poupansa. Maski nune’e, poupansa mós la signifika de’it selu salário ne’ebé ki’ik,” Rui hato’o kestaun ne’e iha rede sosiál semana ne’e, hodi responde sidadaun balun nia preukupasaun katak  asesór nasionál iha Gabineti PM hetan saláriu $11,611.11/fulan.

Tuir preukupante Abel da Silva katak iha lei hakerek saláriu másimu ba asesór nasionál maka $5,000/fulan.

“Agradese ba belun Abel da Silva ninia publikasaun no preukupasaun. Agradese moos komentáriu hosi belun sira seluk. Favor ida hatudu lei ida ne’ebé maka hakerek ”saláriu másimu ba asesór nasionál maka 5,000/fulan”,” Rui hatán.

Nia esplika, deklarasaun ne’ebé nia halo, la’os de’it kona-ba saláriu asesor, maibé atu defini loloos kategoria asesór. Ezbosu Dekretu-Lei ne’ebé Konsellu Ministrus aprova no (infelizmente) Prezidenti Repúblika (PR) la promulga define katak asesór maka ema hirak ne’ebé iha esperiénsia serbisu iha área espesializada ida-idak, liu-hosi tinan 10. Sira seluk ho esperiénsia la to’o tinan 10, klasifika nu’udar profisionál iha ida-idak ninia área.

“Asesór no profisionál sira ne’ebé naran mosu iha lista ne’ebé share iha rede sosiál, selu liu-hosi orsamentu ba serbisu profisionál, ho baze ba kontratu anuál, ne’ebé eziji relatóriu regular kona-ba dezempeñu. Sé sira la hatudu dezempeñu tuir ToR defini, instituisaun hapara sira nia kontratu,” Eis Ministru Sáude informa.

Rui deklara, prosesu rekruta asesór ka profisionál hirak ne’e liu-hosi entrevista, no ida-idak nia ‘professional fee’ determina ho baze ba saláriu ida ikus liu, ho aumentu másimu 10%. Nia hein katak ida ne’e bele esklarese preukupante sira nia preukupasaun. (Matadalan)

Matadalan