Rekursu Calisto Sei Iha Prosesu

DILI - Rekursu arguidu Calisto Gonzaga sei iha prosesu nia laran, seidauk tama iha meja administrador Tribunal Distrital Dili (TDD).

Tuir official justisa neebe lakohi temi naran hatete, rekursu nee sei iha hela prosesu nia laran. Tanba parte rua hanesan defensor no ministeriu publiku seidauk hatama hotu mai iha seksaun krime nian. Sekuandu parte rua nee hatama ona, mak seksaun krime nian sei lori ba iha meja administrador TDD hodi haruka ba iha Tribunal Rekursu.

Nia hatutan, maske parte defesa hatama uluk ona maibe parte Ministeriu Publiku seidauk hatama ninian. Neemos seidauk bele lori ba iha meja administrador, kuandu parte rua nee hatama hotu ona foin bele halo despaisu nee ba iha juis administrador.

Antes nee tuir Defensor Publiku Sergio Quintas neebe fo assistensia ba arguidu Calisto Gonzaga hatete, iha loron 16 fulan nee sira sei hatama rekursu ba  Tribunal Rekursu hodi kontra desizaun neebe fo sai husi Tribunal Distrital Dili (TDD).

Haree ba prosesu ida nee komplikadu oituan, tanba nee ami tenki estuda didiak kona ba akordaun juiz nian. Neebe too ultimu mak ami hatama rekursu atu kontra desizaun TDD,” dehan Quintas.

Tuir DP nee katak, leitura akordaun nee rona iha loron (25/09/2015), nee la sura husi neeba maibe sura husi notifikasaun tribunal nian mai nia hanesan defensoriha loron (01/10/2015). Entaun rekursu nee dekore iha loron nee hotu iha (16/10/2015). Husi loron nee, tempu sei barak ba nia atu halo rekursu.

Liu husi leitura akordaun tribunal nian iha loron (25/09/2015), arguidu Calisto Gonzaga provadu komete krime naun partisipasaun ho sekuestru tribunal aplika pena prizaun tinan 08 fulan nen (6) no selu kustu judisiariu U$ 40. Informasaun kompletu iha STL Jornal no STL Web, edisaun Sabado (24/10/2015). Domingas Gomes

Suara Timor Lorosae