FETO MÓS BELE SAI TÉKNIKU ENGENERIA

Atu sai tékniku engenaria, la’os deit mane maka hili tékniku, maibé feto mos lakohi lakon atu hili fakuldade teknik Engenaria.

Graziela Maria de Fatima da Costa, oras ne’e dadaun eskola iha Universidade da Paz (UNPAZ) foti Fakuldade Engenaria Departamentu Teknik Sipil.

“Ha’u foti Departamentu Téknik Sipil ne’e tanba ha’u hanoin katak, durante ne’e mane maka bele foti teknik, maibé hau mós lakohi lakon ho mane katak, tanba iha ha’u nia ideia rasik katak, ha’u mós bele,” hateten nia ba JN-Diário iha Kampus UNPAZ, Sábadu (17/10).

Nia hateten katak, maski sente todan, maibé ho pasensia kontinua estuda, tanba sukat ho ninia kapasidade rasik katak bele sai feto ida ne’ebé mak iha valór ba nasaun no estadu.

“Ha’u foti departamentu teknik sipil ne’e, ha’u sente todan maibé kuandu dosente sira haruka ami halo dezeñu uma, ami tenki halo duni dezeñu. Dala ruma ami servisu halo dezeñu iha kalan to’o fali loron, no haluha atu han,”katak Graziela.

Feto foinsa’e ne’ebé mak antes ne’e hili dalan ba vida relijioza ne’e, maibé lakonsege sai realidade ne’e maski ema barak sente katak, eskola iha nivel superior ne’e todan, maibé ba nia lasente todan, tanba desizaun foti departamentu teknik sipil ne’e ninia desizaun rasik.

“Komesa husi semester 1, agora tama ona ba semester 3 ne’e, trabalho ne’ebé dosen fo ba ami maka hanesan, pinta uma sederhana, to’o uma mewah berlantai, maibé, ha’u esforsu nafatin, tanba ha’u hakarak sai ema ne’ebé matenek, atu lori nasaun ida ne’e ba dezenvolvimentu nasionál, tanba futuru ne’e iha ita nia liman rasik,”tenik Graziela.

Graziela mai husi familia ida ne’ebé simples, ho vida agrikultura, maibé Graziela kaer metin nia prinsípiu katak, maski inan aman ho vida agrikultura, maibé Graziela Fatima esforsu a’an nafatin, atu sai ema ida ne’ebé diak iha futuru oin mai.

Graziela Fatima, oan ba dala 8 husi maun alin na’in 10, feto 6 mane 4. Oan husi aman Fernando da Costa ho inan Anita da Costa.

Graziela remata nia eskola Primaria Manehat iha tinan 2008, iha tinan 2012 remata eskola Ensinu baziku Sentral Publiku Abat-Oan, no remata Eskola Sekundaria Annur Dili, iha tinan 2014. Graziela Fatima, mai husi Suku Manehaat, Aldeia Issadan, Postu Administrativu Natarbora, Munisípiu Manatuto.eni

Jornal Nacional