ONU preokupa ho tráfiku umanu no violénsia polisiál iha Makau

Komité kontra Tortura hosi Organizasaun Nasoins Unidas aprezenta lista ida ho preokupasaun dezena rua relasiona ho Makau, liu-liu iha tráfiku umanu, violénsia polisiál no akordu ba dezertór. 

Aprezentada ona konkluzaun iha semana kotuk iha Jenebra, bainhira entrega relatóriu periódiku hosi autoridade sira Makau nian no hosi grupu sosiedade sivíl, no agora tama iha dokumentu ida mak disponível iha pájina ONU nian.

Komité destaka tráfiku umanu hanesan preokupsaun tanba " númeru hosi prosesu no kondenasaun ba autór tráfiku nian ki’ik tebes" no rejistu kazu hosi "servisu forsadu, ki’ik maski númeru keixa nian aas".

Aleinde ne’e, "komité lamenta kona-ba falta programa espesífiku hodi hasoru problema turizmu seksuál infantil, maski iha metade resin hosi vítima sira ne’ebé identifika durante períodu revizaun ho idade menus hosi tinan 18 ".

Komité manifesta mós preokupasaun ba "la aplika alternativa legál hodi atribui rezidénsia tanba motivu umanitáriu ba vítima estranjeira sira hosi tráfiku umanu".

Iha relatóriu, destaka kazu tortura ka tratamentu polisiál ne’ebé la di’ak, ne’ebé ONU lembra katak investiga "hosi membru sira polísia nian, hatudu momoos konflitu interese". Hosi keixa 87 ne’ebé aprezenta entre 2006 no 2011 kontra membru forsa seguransa nian, tolu de’it mak fómulta (iha polísia na’in lima). Entre 2013 no 2014, 79% hosi keixa tortura esklui tiha.

Hodi hetan solusaun ba problema, komité sujere atu kria "mekanizmu keixa konfidensiál iha fatin detensaun hotu hodi fasilita aprezentasaun keixa hosi vítima tortura ka tratamentu la di’ak, inklui hodi hetan prova médika hodi apoia sira-nia akuzasaun no garante katak sira ne’ebé hato’o keixa hetan protesaun hosi reprezália".

Ministériu Públiku hetan mós akonsellamentu atu entrega investigasaun ba profisionál independente sira sein kualkér relasaun institusionál ka ierárkika ho alegadu atakante sira, propoin atu suspende suspeitu sira hosi sira-nia funsaun durante investigasaun.

Entrega kriminozu sira ne’ebé halai, atualmente iha negosiasaun ho Xina no Hong Kong hanesan mós tema ida seluk ne’ebé halo ONU preokupa: "Komité lamenta kona-ba falta informasaun kona-ba konteúdu hosi akordu hirak ne’e. Komité preokupa atu kriminozu transferidu sira bele sujeita ba risku tortura ka tratamentu la di’ak bainhira detidu ka iha prizaun bainhira fila ba Xina lka liuhosi transferénsia indireta liuhosi Hong Kong".

Iha pontu ne’e, komité subliña katak Makau "la bele halo transferénsia ba dezertór sira ba Xina Kontinentál, iha ne’ebé iha motivu substansiál hodi fiar katak sira iha perigu atu sai sujeitu ba tortura bainhira fila ka hafoin transferénsia indireta".

Iha relatóriu ne’e hatutan tan katak falta formasaun  profisionál  iha área oioin atu identifika vítima ho tortura no sujere atu reforsa tan profisionál saúde, ajente ne’ebé envolvidu iha investigasaun, korpu polisiál hot-hotu, juís, Ministériu públiku no funsionáriu iha servisu prizionál no mós imigrasaun.

Komité mensiona mós violénsia doméstika, ne’ebé iha Makau maka abranje kazál ho seksu hanesan iha lei protesaun  vítima nian, ne’ebé aprova tiha ona iha tinan ida ne’e.

ONU subliña tan katak definisaun ba tortura, sei iha revizaun nia laran, bele tuir Konvensaun kontra tortura no “ garante katak dirijente públiku hotu ka ema seluk ho kargu ofisiál bele hetan akuzasaun bainhira komete aktu tortura”.

Agora dadaun, definisaun ida ne’e só aplika deit ba sira ne’ebé kumpre funsaun iha relasaun ho investigasaun ba infrasaun ka disiplina, ezekusaun ba sansaun,ka protesaun, guarda ka vijilánsia ba ema ne’ebé detidu ou prezu,tuir kódigu penál.

Hanesan komité ONU sira seluk, moos fó hanoin bá Makau hodi kria instituisaun  independente ne’ebé foka liu ba defende direitus Umanus, ideia ida ne’e Governu Makau rejeita tiha ona hodi konsidera katak Komisariadu kontra korrupsaun kumpre ona papél ne’e.

Iha resposta ikus ne’ebé hato’o ba komité ONU nian, iha fulan kotuk, Governu Makau, alénde asegura katak iha territóriu lejislasaun no mekanismu ne’ebé “ garante atu kompleta protesaun ba direitus umanus”. Subliña moos katak, relasaun ho tráfiku umanu iha grupu lima maka  hala’o aktividade  atu resposta bap roblema ne’e. alénde formasaun no treinu espesializadu ba ajente seguransa no moos professionál area sosiál no saúde nian.

SAPO TL ho Lusa