BEMVINDU PREZIDENTE RI JOKOWI

Estadu Timor-Leste (TL) oras ne’e dadauk antusiasmu maka’as hodi prepara simu vizita Prezidente Repúblika Indonesia (RI) Joko Widodo (Jokowi) ne’ebé tuir planu sei mai rai ho simbolu Lafaek ne’e iha loron Tersa (26/1/16).

Jokowi sei mai TL ho aviaun Prezidente RI nian ho marka Boeing 737 800. Bainhira to’o TL iha Aeroportu Nicolau Lobato Dili, Prezidente Jokowi sei simu husi nai ulun TL nian. Prezidente Jokowi ho nia delegasaun sei deskansa iha Hotel Timor.

Vizita Prezidente RI Jokowi mai TL ne’e sei akompanha mos husi Primeira Dama, Hj. Iriana Joko Widodo.

Iha ajenda ne’ebe iha Prezidente Jokowi sei akompanha husi membru Governu sira vizita Taman Makam Pahlawan (Jardim dos Heoris Indonesia), Jardim dos Herois Metinaro, sei inagura Sentru Kultural Indonesia nian.

Prezidente Jokowi mos sei hasoru malu ho Prezidente Republika Taur Matan Ruak, Primeiru Ministru Rui Maria de Araújo hodi koalia kona ba kooperasaun bilateral.

Hafoin vizita tiha fatin importante sira iha Timor-Leste ne’e, Prezidente Jokowi ho nia komitiva sei desloka kedas ba Aeroportu Internasional Nicolau Lobato, no iha tuku 17:30 Prezidente ho nia komitiva sei fila hikas ba Jakarta.

Relasiona ho vizita Prezidente Jokowi nian ne’e, preparasaun ne’ebé Timor-Leste halo maka enkontru interministerial iha Ministeriu Negosius Estranjeirus no Kooperasaun Praia dos Coqueiros Dili foin lalais hodi fahe servisu ba kada Ministeriu atu bele haree ida-idak nia servisu no responsabilidade diak liu tan nune’e bele fo sussesu ba vizita ema numeru ida husi RI ne’e.

Iha kontekstu vizita Prezidente RI nian mai TL ne’e la’os deit husi nai ulun nasaun nian mak antusiasmu hodi prepara simu, maibe husi komunidade sira liu-liu estudante sira husi eskola non profesional no profesional sira mos espresa sira nia sentimentu kontenti hodi simu. Estudante sira ne’e balun ba pinta halo foun Palasiu Prezidensial no mos jardin sira ne’ebé iha.

Nune’e mos iha Jardin Palasiu Governu membru Governu kontrata kompañia Panca Sekawan hodi pinta no hadia baki lolon sira ne’ebe maka tinta sai hotu ona atu bele pinta halo foun fali.

Maske iha tempu pasadu Timor-Leste ho Indonesia iha istoria metan maibe iha tempu independensia ne’e Timor-Leste konsege halo rekonsiliasaun ho RI no agora hetan paz no relasaun diak.

Iha vizita Prezidente Repúblika Taur Matan Ruak nian ba Suku Barikafa, Postu Administrativu Luro, Munisipiu Lautem, Kuarta (20/1/2016), hateten katak, Timor-Leste fo benvindu ba Prezidente RI Jokowi ne’ebe sei vizita Timor-Leste hodi hametin diak liu tan lasu bilateral.

Xefi Estadu hatutan, iha tomada de posse Prezidente RI nian iha iha Jakarta liu ba, iha ne’eba mak konvida Xefi Estadu ne’e atu mai vizita TL.

“Iha tempu pasadu Indonesia iha istoria ne’ebe mak aat ho diak ho ita, ita presiza nafatin buka atu kria relasaun ne’ebe diak ho Indonesia, tanba sira hanesan ita nia nasaun viziñu,” PR Taur salienta.

Antes ne’e eis Prezidente Indonesia nian, Susilio Bambang Yudhoyono mos mai vizita ona TL, iha vizita koalia asuntu inportante barak tebes.Ekipa JNDiario

Jornal Nacional