domingo, 13 de março de 2016

CNRT OFISIALMENTE HASAI PARTIDU DEMOKRATIKU HUSI BLOKU KOLIGASAUN


DILI - Atraves komunikadu Partidu CNRT lideradu Xanana gusmao ofisialmente hosi ninia Komisaun Politika Nasional anunsia ba publiku katak hasai ona PD hosi bloku koligasaun nia laran ho razaun lubuk ida hanesan sita iha deklarsaun kompletu CNRT ninian iha sira ninia komunikadu.

Atu konsolida Estadu de direitu demokratiku hodi hametin Unidade, Estabilidade no Dezenvolvimentu Nasional, hahú 2007, Partidu CNRT ho Partidu Democrátiku (PD) liu husi figura Saudozu Fernando Lasama de Araújo, harii no halao ona relasaun institusional ida diak tebes tuir principiu sira Aliansa Maioria Parlamentar (2007) ho Bloku da Koligasaun (2012).

Maibe situasaun hahu muda wainhira Kompanheiru Saudozu Lasama ne’ebe valoriza tebes Partidu CNRT ho PD nia kompromisiu, fila ba Aman Maromak nia kadunan Santo. Partidu CNRT hahu observa mudansa husi klalaok Kompanheiru sira sira iha Bancada PD Parlamentu Nasional iha fulan hirak ikus, ne’ebe la komunga ona komprimisiu ne’ebe Saudoso Lasama hahí no valoriza tebes. Tanba né Partidu CNRT hakarak haktuir pontu observasaun hirak tuir mai ne’e.

Partido CNRT akompanha declarações repetitivas hosi Presidente Interinu PD nudar membru Parlamentu Nasional ne’ebe sempre kuestiona programa governu nian ne’ebe Partidu Democratiku rasik halo parte.

Partido CNRT mos akompanha klalaok Bankada PD durante debate sira ba Orçamento Geral do Estado 2016 ne’ebe la refleta espírito no interesse nebé bloku Koligasaun kompromete hamutuk ona.

Partidu CNRT mos akompanha reasaun ne’ebe Bancada PD hatudu liu hosi declarasaun sira Presidente Interinu PD nian iha media publiku kona ba mensagem de Estado da SE. Sr Presidente da República.

Partido CNRT mós konsiente ho pozisaun ne’ebe Bankada PD hola durante ne’e inklui mos deklarasaun membru Bancada PD Dr. Virgílio Hornai ba ezizensia Partidu CNRT nian relasiona ba mensagem SE. Presidente da República ne’ebe atinji dignidade no sentimentu pesoal husi Presidente Partidu CNRT Maun Boot Kay Rala Xanana GusmÄ
o.

Hafoin analiza tiha kestaun hotu-hotu inkluindu sira ne’ebe temi iha leten kona-ba postura foun ne’ebe orienta pozisaun polítika PD, maka Comissão Política Nacional (CPN) Partidu CNRT hafoin estuda ho analiza, no konsulta mos ho orgun lideransa sira Partidu nian konklui katak parseiru polítiku ida ne’e la obedese ona ba komprimisiu sira ne’ebe hatuur tiha ona iha âmbito Bloku Koligasaun nian. Ho hune’e konklui mos katak Bankada PD iha Parlamento Nasional viola ona espíritu Koligasaun ka ho lia fuan seluk la-halo parte ona hosi parseiría ne’ebe harii dezde tinan 2007.

Ho ida ne’e, nu’udar partidu maioritáriu ne’ebe prezide koligasaun, informa ona formalmente ba Nai Presidente Interinu Partido Democrático ho nia estrutura tomak katak Partidu CNRT lakon ona konfiansa ba PD hanesan parseiru iha koligasaun atu garante estabilidade governativa, quer iha Parlamentu Nasional no mós iha governo, efetivamente hosi loron ohin, 11 de Março de 2016.

Deklarasaun original bele asesu iha 

Relasiona ho informasaun ne’e Timor Post sei tenta atu hetan resposta hosi Partidu PD ninian.

Timor Post

Sem comentários: