PN Aprova Lei Resensiamentu, Fo Dalan Ba Timor Oan Iha Estrangeiru Tuir Elisaun

Membru Parlamentu Nasional, Deputadu Francisco da Costa, hateten Parlamentu Nasional (PN) aprova ona lei resensiamentu hodi fo dalan ba timor oan sira ne’ebe hela iha estrangeirus bele partisipa iha eleisaun 2017 tuir mai.

Nia hateten, iha konstituisaun Republika Demokratika Timor-Leste (RDTL), artigu 3 mensiona kona ba estadu Timor-Leste rekonese nia sidadaun iha Timor laran no iha rai liur, tanba ne’e parlamentu presiza halo lei resensiamentu hodi fasilita timor oan iha estrangeirus tuir eleisaun.

“Lei ne’e parlamentu aprova hodi fo mos oportunidade ba ema sira ne’ebe mak hela iha estrangeirus atu tuir eleisaun iha 2017 mai,” Deputadu Costa hateten.

Tanba ne’e, nia husu, ba governu liu husi Sekretariadu Tekniku Administrasaun Eleitoral (STAE) atu organiza ho rigorozu prosesu implementasaun lei ne’e iha baze.

“Governu tenke prepara orsamentu ne’ebe mais sufsiente atu kobre hotu sidadaun iha rai liur, no kria sistema ne’ebe diak ba implementasaun lei ne’e rasik,” nia sujere.

Iha parte seluk Vise Ministru Administrasaun Estatal , Thomas do Rosario Cabral, hateten hafoin Prezidente da Republika promulga sei divulga iha rai laran hodi halo ajustamentu, no STAE sei kolabora ho Ministeriu Negosiu Estrangeirus e Kooperasaun hodi identifika nasaun ne’ebe mak presiza halo resensiamentu.

Nia dehan, ba timor oan ne’ebe hela iha estrangeirus tenke ba halo inskrisaun iha embaixada no konsuladu ne’ebe kolokadu ona, tanba prosesu resensiamentu bazea mos ba dadus husi embaixada no konsular ne’ebe iha.

“Timor oan ne’ebe la ba halo inskrisaun iha embaixada, nia la hetan nia direitu ba resensiamentu, tenke ba halo inskrisaun iha embazada no konsuladu ne’ebe iha ona,” Cabral hateten.

Ba timor oan ne’ebe hela iha Indonezia no sai ona sidadania Indonezia, maibe hakarak halo resensiamentu iha Timor, nia dehan, STAE sei haruka nia dokumentus kompleto ba iha embaixada Indonezia hodi hasai tiha nia sidadania Indonezia, e sir abele tuir eleisaun, tanba Indonezia la dupla sidadania.

“Ne’e prosesu ne’ebe mak ita atu halo,” Cabral hateten.

The Dili Weekly