PN KONSIDERA JOVEN KONTRIBUI INSTABILIDADE

Parlamentu Nasional (PN) konsidera Jovens sira ne’ebe mak kalan-kalan sempre hana malu, baku malu no sona malu hodi kria problema kontribui ba instabilidade nasaun nian.

Tuir deputadu bankada Frente-Mudança, Jorge da C. Teme dehan, impaktu husi hahalok jovens sira nian ne’e maka kontribui ba instabilidade nasaun nian.

“Jovens sira nia hahalok hodi hamosu problema ne’e maka kontribui ba instabilidade nasaun nian, pergunta ba ita maka, ne’e mak ita HAKarak? Durante luta tinan 24 nia laran, ita HAKarak para rai ne’e hetan indepensia, mais ita koko fali kria instabilidade para moris ne’e nafatin iha infernu nia laran hau hanoin lae, objetivu ita luta liberta rai no povu para ita moris HAKmatek, kuandu moris HAKmatek konserteza tenke kria ambiente ne’ebe justu liu husi justisa sosial, labele ema riku riku ba bei-beik akontese ona hanesan ne’e maka mosu ona cemburu sosial,” hateten deputado Jorge Teme ba Jornalista sira iha uma fukun PN, Sesta (11/03/2016).

Teme hatutan, koalia kona ba situasaun iha rai laran (red-Timor) ne’e kompleksu teb-tebes, tanba seidauk iha peskija ida hodi halo konkluzasaun katak, joven sira hana malu ka sona malu tanba serbisu laiha, ne’e mos tanba karakter building ne’ebe iha ita nia joven sira nia an rasik.

“Timor ne’e rai manas, ami iha parlamentu mos koalia soke malu oitoan rai atu naben tiha deit ona, ne’ebe ita dala ruma lakontrolu emosaun, lapasiensia ne’e maka kontribui hotu ba instabilidade iha ita nia rain. Joven sira laiha komitmentu atu halo serbisu iha loron aban, ohin kalan sira HAKarak mete halo problema liu husi hemu tua, toka iha dalan publiku, sira sente sira laiha responsabilidade, tanba aban sira laiha serbisu,” Teme sublinha.

Bainhira husu kona ba krime sira ne’ebe mak mosu iha tempu kalan hodi hamate joven balun, reprezentante povu ne’e dehan, nia laiha dadus no provas katak organizadu.

“Hau laiha dadus no provas ruma hodi hatudu katak krime sira ne’e organizadu, maibe ita hatene katak ita nia jovens sira moris ho organizasoens oi-oin hanesan arte-marsiais no mos organizasaun seluk, ne’ebe kada organizasaun sira iha sira nia karater no sira nia visaun no misaun,” dehan Nia.

Iha fatin hanesan, deputado bankada FRETILIN, Francisco Miranda Branco realsa tan katak, joven sira ne’ebe mak halo problema iha tempu kalan ne’e tanba joven sira tun hotu husi foho mai konsentra hamutuk iha kapital Dili.

“Ita hare jovens barak husi foho mai konsentra hotu iha Dili, entaun serbisu laiha provoka malu halo problema, realidade hau ba iha Grotu Municipiu Manufahi nian iha ne’eba mesak katuas ho ferik sira deit,” dehan nia.

Branco fo sasin katak, fenomena ne’e ida ne’e la’os deit akontese iha Timor, maibe mos iha nasaun sira seluk.

“Tanba ne’e maka ami hanoin katak setor agrikultura tenke dezenmvolve maka’as no institusoens bankarias tenke fo ona kreditu ba ema ne’ebe HAKarak investe iha agrikultura se lae maka sei hamamuk hotu areas produtivas iha Timor laran tomak hot-hotu mai moris iha cidade ida ne’e fator ida ne’ebe bele lakontribui diak ba kestaun estabilidade, tanba hot-hotu hamutuk iha fatin ida depois mosu problema sosial, problema ekonomiku bar-barak,” dehan nia. mia

Jornal Nacional