Fevereiru hanesan manas liu 1,35º iha mundu tomak

Fevereiru hanesan manas liu 1,35º duké temperatura médiu istóriku hosi fulan ne'e iha mundu tomak. 

Temperatura globál sira iha fulan-Fevereiru halo rekord istóriku ho marjen boot ida, haktuir hosi informasaun sira hosi ajénsia norte-amerikanu NASA, ne'ebé fó hanlin fali nesesidade ba medida sira ne'ebé bele hamenus alterasaun klimátiku sira.

Tuir NASA, temperatura globál sira sa'e ba 1,35º relasionadu ho temperatura média sira ba fulan ne'e ne'ebé sukat iha períudu tinan 1951 no 1980. "Hanesan xoke boot ida no lembransa ida hosi aumentu ida ne'ebé akontese beibeik hosi temperatura globál sira ne'ebé mosu tanba gás sira ho efeitu estufa ne'ebé ema moris halo", hakerek hosi Jeff Masters ho Bob Henson iha blog Weather Underground, ne'ebé analiza ona informasaun sira.

Iha fulan-Janeiru mosu ona rekord ida hosi temperatura nian, ho termómetru sira sa'e ba 1,15 ho relasaun ba média globál iha fulan ne'ebá.

Weather Underground esplika mós katak maski iha fenómenu ne'e mosu hosi El Niño, iha Oseanu Pasífiku, lia loos maka temperatura sira aumenta liu iha El Niño ikus ne'e iha tinan 1998, fenómenu ida ne'ebé sai violentu liu hanesan iha tinan ne'e.

"Ita iha situasaun ida hanesan emerjénsia klimátiku", esplika ona baFairfax Media hosi Stefan Rahmstorf, hosi Postdam Institute of Climate Impact Research, hosi Alemaña. "Ne'e hanesan inkrivel tebes no nunka akontese", nia hakotu.

SAPO TL ho Green Savers